VOV4.Bahnar - Kơ sơ̆ brei (25/6), Tổng Bí thư Nguyễn Phú Trọng hlôi pơ gơ̆r ‘măng hop akŏm Anih tơm Chĭnh trĭ vă ăn tơ gop nơ̆r găh 1,2 trong jang tơ gŭm bơ ngai jang păng bơ ngai yua bơ ngai jang tơ ƀơ̆p mơ mat tat yua đơ̆ng jĭ hơ buh Covid 19. Anih tơm Chĭnh trĭ hơ len lăng, rim ‘măng jĭ Covid 19 lơ̆m sơ năm sơ̆ păng sơ năm ‘nâu đei ƀôh tôch kơ krê hơ mơt, hlôi ƀơm ư̆h kơ ‘lơ̆ng tih truh rim tơ drong jang pơm tơ lĕch tĕch mơ dro, pơ vih pơ văn, mă loi ‘noh jĭ tơ̆ rim anih jang kơ măy kơ mŏk, anih pơm tơ lĕch. Pơ ma pơ tôch ‘măng hop akŏm, Tổng Bí thư Nguyễn Phú Trọng tơ băt, Anih tơm Chĭnh trĭ drơ̆ng nơ̆r ăn trong jang hơ nơ̆ng tơ lĕch trong jang tơ gŭm ăn bơ ngai jang păng bơ ngai yua bơ ngai jang tơ ƀơ̆p mơ mat tat yua đơ̆ng ƀơm kơ nê̆ đơ̆ng jĭ hơ buh covid 19.

Tổng Bí thư Nguyễn Phú Trọng pơ ma pơ tôch ‘măng hop akŏm

Pơ ma hơ dăh, lăng băt đơ̆ng tơ drong jang kiơ̆ tơ chơ̆t 42 đơ̆ng Khŭl kơ dră teh đak păng chih iŏk tơ drong hlôh vao, trong jang tơ gŭm đơ̆ng rim teh đak lơ̆m apŭng plĕnh teh vă akŏm dăr hơ len, băt hơ dăh ƀlep bơ ngai kăl kơ tơ gŭm 1 trong hơ dăh, pơ jing kơ sô̆ jên tơ gŭm lăp, vei sơ đơ̆ng kơ jăp, hơ tŏ hơ nơ̆ng, rơ đăh, đei yua ‘lơ̆ng. Tổng bí thư Nguyễn Phú Trọng tơ tă jĭ hơ buh oei đei ƀôh krê hơ mơt, yua thoi noh ư̆h kơ gơh pơm pơ hơi lơ̆m tơ drong jang tang găn jĭ hơ buh.

Thuem: Tơ blơ̆