VOV4.Bahnar – Anih jang Kanh sat vei lăng hanh chĭnh găh vei xơđơ̆ng tơpôl, Anih tơm Kŏng ang hlôi pơm lêh tơbang iŏk yua phân mêm vei lăng kon pơlei tơring hơbuh pơrang jĭ lơ̆m jâ̆p teh đak kiơ̆ tơdrong chih akŏm kơ teh đak găh tơring kon pơlei oei xa. Kiơ̆ kơ noh,  Anih jang Kanh sat vei lăng hanh chĭnh găh vei xơđơ̆ng tơpôl hlôi iŏk yua phân mêm vei lăng kon pơlei tơring hơbuh pơrang jĭ tơ̆ plei tơm Hà Nội păng dêh char Quảng Ninh kiơ̆ pơkăp tơroh hăm Tơdrong chih akŏm kơ teh đak găh tơring kon pơlei oei xa. Hlôi keh đang phân mêm vă 'măn ăn tơdrong chih akŏm tơbang gơh hiôk hian hloh, vei xơđơ̆ng kơtơ̆ng ang, 'măn jang đei jơnei tơnăp găh tang găn păng tơjră pơrang jĭ Covid lơ̆m khei năr dang ei. Trung tá Nguyễn Thành Vĩnh, Phŏ Kơdră Anih chih akŏm găh tơring kon pơlei ăn tơbăt, kiơ̆ phân mêm vei lăng kon pơlei tơring pơrang jĭ, kon pơlei ăh iŏk yua gô tơtom chih akŏm hơdăh găh tơdrong hơbuh pơrang jĭ tơ̆ tơring po erih xa, pơm jang, tơtom pơm kiơ̆ dôm trong tang găn. Kơdih chih tơroi, pơjing pơkăp QR code vă hơlen tơ̆ anih pơkăp hơlen pơrang jĭ, ưh đei hiong jơ chih tơbang hăm hla bar, pơm tơhlăk tơhlĭn; khul kơpal kiơ̆ đơ̆ng phân mêm âu, gô tom akŏm băt tơdrong đei ƀôh, vei lăng kon pơlei tơ̆ tơring pơrang jĭ vă tơgŭm pơgơ̆r tang găn păng tơjră pơrang jĭ Covid-19.

Lan chih păng pơre nơ̆r