VOV4.Bahnar – Pơgê âu (22/6), tơ̆ Hà Nội, Anih tơm Kŏng ang pơgơ̆r Hop akŏm kiơ̆ pơkăp trư̆k tuyê̆n Xơkơ̆t tơdrong chih akŏm Tơdrong kăl hơlen kơ teh đak găh tơring oei xa, Tơring pơm jang, axong bơ̆ theh Kăng kươk kon pơlei păng lêh tơbang iŏk yua Tơdrong hơlen âu đơ̆ng năr 1/7/2021. Tơdrong chih akŏm Tơdrong Kăl hơlen găh tơring oei xa jing minh lơ̆m dôm xơnong jang tơm, pơjing tơdrong kăp gĭt ăn vei lăng hành chĭnh kơ teh đak kiơ̆ trong 'nao rơgei dang ei, iŏk yua kŏng ngê̆ thŏng tin lơ̆m xek tơlang hla bar hành chĭnh ăn kon pơlei, anih jang mŭk drăm, vă pơm hiôk găh hla bar pơkăp hành chĭnh, tơjur ƀiơ̆ dôm hla bar ưh kơ kăl, da ƀiơ̆ huach jơ păng jên hu lơ̆m tơdrong bơ̆ hla bar hanh chĭnh, hơtŏk tơnăp tơdrong vei hơlen đơ̆ng teh đak păng tơgop hơtŏk tơdrong pơjing jơnŭm pơgơ̆r điê̆n tưh kơ teh đak. Hăm dôm tơdrong jang hlôi đei jơnei, Anih tơm Kŏng ang hlôi tơbang keh đang dôm tơchơ̆t chih akŏm Tơdrong Kăl hơlen kơ teh đak găh tơring oei xa păng jang xa, axong bơ̆ păng vei lăng kăng kươk kon pơlei. Ƀar tơdrong jang âu gô pơtơm iŏk jang đơ̆ng năr 1/7/2021 păng kơchăng tơroh hăm dôm anih jang tơm, rim anih jang, rim tơring 'măn ăn tơdrong pơjing Jơnŭm pơgơ̆r điê̆n tưh păng 'măn pơm jang ăn kon pơlei.  

Lan chih păng pơre nơ̆r