VOV4.Bahnar – Dang ei jâ̆p teh đak oei hloh 26 rơbâu ‘nu bơngai pơlong tơ̆ 42 dêh char, plei tơm tam mă pơlong tôt ngĭp trung hŏk phôh thŏng. ‘Nâu jing dôm bơngai F0, F1, F2 dăh mă oei erih lơ̆m tơring pơkăp oei tơklăh, pơvei kơyuơ răm đơ̆ng pơrang jĭ COVID-19. Anih tơm Pơtho Pơhrăm ‘nao pơtruh hla bar ăn Anih vei lăng kon pơlei dôm dêh char, plei tơm mă Trung ương vei lăng găh tơdrong pơgơ̆r pơlong tôt ngĭp THPT ‘măng mă 2. Kiơ̆ kơ noh, ‘măng mă 2 kơ tơdrong pơlong tôt ngĭp THPT 2021 gô đei pơgơ̆r lơ̆m dôm năr 6 păng năr 7/8 ăn bơngai tam mă akŏm pơlong dăh mă ưh đei keh đang ‘măng pơlong mă 1 âu ki. Bơngai chih kơtơ̆ng ang ăn Rađiô nơ̆r pơma Việt Nam đei pơma dơnuh hăm Thư̆  trưởng Anih tơm Pơtho Pơhrăm Nguyễn Hữu Độ găh tơdrong âu:

-Thư̆ trưởng Nguyễn Hữu Độ ăi! Hăm tơdrong hơbuh hli đơ̆ng pơrang jĭ thoi âu, apinh ih ăn tơbăt Anih tơm Pơtho Pơhrăm gô đei trong jang thoi yơ vă vei xơđơ̆ng tơdrong pơlong ăn dôm bơngai tam mă gơh akŏm pơlong tôt ngĭp THPT ‘măng mă 1?

Thứ trưởng Nguyễn Hữu Độ: Bơ̆n ƀôh hơdăh noh, pơrang jĭ hơbuh roi năr roi hli hlơt tơ̆ jâ̆p tơring dang ei, kơsô̆ bơngai ƀơm jĭ truh kơ rơbâu ‘nu lơ̆m minh năr, Anih tơm Pơtho Pơhrăm ƀôh tơdrong pơgơ̆r pơlong ‘măng mă  2 tơpă jĭ minh tơdrong tơnap tap. Mă thoi noh, ‘măng mă 1 hlôi đei pơgơ̆r hăm hloh 96% kơsô̆ bơngai năm pơlong, kơsô̆ bơngai pơlong oei noh gô pơlong ăh ‘măng mă 2, kiơ̆ tơroi đơ̆ng dôm tơring noh oei pơhlom hloh 26 rơbâu 254 ‘nu tơ̆ 42 dêh char, plei tơm. Păng hăm tơdrong đei ƀôh noh, kơsô̆ bơngai pơlong âu gô axong pơlong ‘măng mă 2. Anih tơm Pơtho Pơhrăm gô pơgơ̆r pơlong ‘măng mă 2 hăm pơkăp, vei xơđơ̆ng ăn tôm bơngai năm pơlong mă tam đei pơlong ‘măng mă 1 kiơ̆ tôm tơdrong gô đei pơgơ̆r pơlong ‘măng mă 2.

- Thoi noh pơkăp pơlong tôt ngĭp THPT ‘măng mă 2 gô đei pơgơ̆r thoi yơ, hă ƀok?

Thứ trưởng Nguyễn Hữu Độ: Găh pơkăp pơlong ‘măng mă 2 noh Anih tơm Pơtho Pơhrăm hlôi hop akŏm hăm 42 dêh char, plei tơm păng hlôi drơ̆ng nơ̆r hăm Anih vei lăng kon pơlei dôm dêh char, plei tơm pơlong ăh năr  5, 6, 7/8 păng kiơ̆ kơ noh, dôm Anih jang Pơtho Pơhrăm hlôi tơroi hăm Anih vei lăng kon pơlei dôm dêh char păng dang ei Anih tơm Pơtho Pơhrăm  hlôi iŏk đei minh ƀar hla bar pơkăl đơ̆ng Anih vei lăng kon pơlei dôm dêh char, plei tơm mă pơrang jĭ hơbuh hli, pơkăl pơlong ăh năr 5, 6, 7. Kơyua thoi noh, Anih tơm Pơtho Pơhrăm hlôi đei hla bar drơ̆ng nơ̆r pơgơ̆r pơlong tôt ngĭp THPT ‘măng mă 2 ăh năr 5, 6, 7/8/2021 păng kiơ̆ kơ noh duh tŏk bŏk pơkăl rim tơring jang dôm tơdrong kăl găh kih thuơ̆t.

Hơdăh noh, athei đei hơnăn hơdăh kơ rim ‘nu pơlong păng đei tơdrong ưh kơ ‘lơ̆ng găh tơplih jơnŭm pơgơ̆r pơlong. Pơtih nhen, đei lơ dêh char adrô̆ đei minh ƀar ‘nu pơlong ‘măng mă 2, đei dêh char noh đei 100 ‘nu pơlong noh gơh pơtruh tơ̆ dôm dêh char nai vă tơjur ƀiơ̆ jơnŭm pơgơ̆r pơlong vă kơ hăp gơh hiôk hian trŏ ƀlep hloh. Đe hŏk tro mă ‘meh thoi noh, kiơ̆ tơdrong pơdrơ̆ng đơ̆ng 2 jơnŭm pơgơ̆r pơlong noh Anih tơm Pơtho Pơhrăm gô drơ̆ng nơ̆r păng gô axong phân mêm vă chih kơsô̆ pơkăp, lăm pơlong vă đe oh gơh vang pơlong tơnăp hloh. Dang ei, Anih tơm hlôi pơtruh hla bar pơkăl dôm tơring tơbang găh trong pơlong ăn dôm tơring vă vei xơđơ̆ng lơ̆m khei năr pơrang jĭ hơbuh hli păng adoi vei xơđơ̆ng găh tơdrong pơgơ̆r pơlong.

- Hăm dôm tơring đei pơrang jĭ hơbuh hli hlơt, bơngai ƀơm jĭ tŏk kơ hrĕng, phŏ tŏk kơ rơbâu ‘nu rim năr noh Anih tơm đei trong jang thoi yơ?

Thứ trưởng Nguyễn Hữu Độ: Hăm dôm tơring mă pơrang jĭ hơbuh hli hlơt noh Anih tơm adoi oei kơchĕng noh đei jơhngơ̆m pran hăm bơngai hŏk noh kơpal hloh, noh ăh pơgơ̆r pơlong tơpă gơh xơđơ̆ng. Anih tơm Y tê̆ hlôi đei trong pơgơ̆r xơđơ̆ng, jô̆ hloi hŏk tro pơlong noh F1, F2 vă vei xơđơ̆ng. Mă thoi noh, vă vei xơđơ̆ng lơ̆m khei năr pơrang jĭ hơbuh hli jâ̆p jang tơring thoi noh, ưh đei chă ƀôh F0 noh tơpă tơnap tap. Noh hăm dôm tơring yơ ưh kĕ pơgơ̆r kơyua ưh đei xơđơ̆ng noh pơtruh nơ̆r hăm Anih tơm vă đei trong tơgŭm ăn đe oh. Đei hloi tơdrong xek hơlen kăp gĭt hloh ăn đe oh. Kơlih hăm tơdrong đei ƀôh dang ei noh pơgơ̆r pơlong ‘măng mă 3 lơ̆m khei năr pơrang jĭ hơbuh hli hlơt noh tơdrong pơgơ̆r adoi ƀơm lơ tơnap tap. Noh Anih tơm adoi hơlen lăng hăm dôm tơdrong thoi ăi adoi gơh xek hơlen kăp gĭt ăn đe oh păng đei trong tơgŭm ăn đe oh lơ̆m tơdrong pơkăp năm hŏk đăi hŏk gơh trŏ ƀlep hăm tơdrong pơkăl dang ei.

-Ŏ ah, bơnê kơ Thư̆ trưởng hơu!

Lan - Zưt chih păng pơre nơ̆r