VOV4.Bahnar - Tơ̆ xăh Trung Lý, apŭng Mường Lát, dêh char Thanh Hóa ‘nao pơm lêh hơ păh hnam man ăn unh hnam tơ nuh, mơ mat tat găh hnam oei. ‘Nâu jĭ tơ drong jang yoa Anĭh tơm vei lăng Công an jang hơ doi hăm dêh char Thanh Hóa păng Anĭh mong jên tĕch mơ dro Việt Nam Vietcombank tơ gŭm “Man 600 tŏ hnam ăn unh hnam tơ nuh tơ̆ apŭng Mường Lát”. Kiơ̆ trong jang, tơ drong jang âu vă tơ gŭm 30 ti hlak jên ăn apŭng Mường Lát vă man 600 tŏ hnam ăn dôm unh hnam tơ nuh. 1 pôm hnam đei kơ jă 50 triu lăp hăm 3 tơ drong hơ găt: “Hơ nă kơ jăp, bơ bŭng kơ jăp, tơ năr kơ jăp” pơm kiơ̆ rup hnam đơ̆ng Anĭh tơm vei lăng Công an tơ lĕch.  

Ƀok Kơ dră tơm Tô Lâm pơ jao hnam ăn bơ ngai tơ nuh tơ̆ Thanh Hóa

Mường Lát  jĭ apŭng tơ nuh hlŏh kơ dêh char Thanh Hóa păng kŭm jing 1 lơ̆m 56 apŭng tơ nuh hlŏh lơ̆m tĕh đak. Đơ̆ng tơ drong ‘nâu, Anĭh tơm vei lăng Công an pơ tho ăn dôm anih jang kơ pal găh sư tơ chĕng hơ len, chă rơih rup hnam vă pơm đang kơ ‘nŏh pơ jao ăn Công an dêh char Thanh Hóa pơ gơ̆r kŭm hăm kon pơ lei apŭng Mường Lát man, hơ met ming hnam oei, vang pơm sơ đơ̆ng tơ drong arih xa ăn kon pơ lei tơ nuh. Dang ei đĭ man đang 9 tŏ hnam păng adrin truh đĭ khei 5/2021 ‘nŏh man đang 600 tŏ hnam, pơ jao ăn dôm unh hnam tơ nuh hin kơ apŭng Mường Lát.

Dơ̆ng: Tơ blơ̆