VOV4.Bahnar - Tơ̆ xăh Yên Bài, apŭng Ba Vì, pơ lei tơm Hà Nội, Anih tơm vei lăng khŭl linh ‘nao pơ gơ̆r lêh tơ lĕch jang tơ drong jang pơ tăm 1 ti tơm ‘long – “Yua kơ 1 Việt Nam rơ goh ‘lơ̆ng".

Thượng tướng Phan Văn Giang vang pơ tăm ‘long đơ̆ng rong lêh tơ lĕch jang

Tang măt Quân ủy Trung ương, Anih tơm vei lăng khŭl linh, Thượng tướng Phan Văn Giang athei rim anih jang, anih khŭl linh hơ nơ̆ng jang ‘lơ̆ng hloh dơ̆ng tơ drong jang tơ roi tơ băt, pơ tho pơ hrăm, vei kơ jăp, jang kiơ̆ tơ păt tơ drong tơ chơ̆t đơ̆ng Thủ tướng teh đak păng tơ drong tơ chơ̆t đơ̆ng Kơ dră Anih tơm vei lăng khŭl linh; hơ tŏk ‘lơ̆ng đon hlôh vao ăn kơ rim kang ƀô̆, khŭl linh, bơ ngai jang khŭl linh găh đei yua tih tên păng kăp gĭt đơ̆ng tơ drong pơ tăm ‘long, vei lăng bri, pơm tơ drong jang pơ tăm ‘long jơ̆p jang lơ̆m đĭ đăng khŭl linh, tơ gop vei lăng cham char bri brăh, tơ jur đei ƀơm ư̆h kơ ‘lơ̆ng đơ̆ng tŏ ‘mi kial tơ plih. Athei rim anih lơ̆m khŭl linh tơ tĕnh tơ lĕch jang trong jang pơ tăm ‘long, pơ tăm bri kiơ̆ trong tơ lĕch jang 5 sơ năm 2021 – 2025.

Thuem: Tơ blơ̆