VOV4.Bahnar - ‘Năr 15/10, Đại tướng Tô Lâm, Kơ dră Anih tơm vei lăng Kŏng an pơ gơ̆r jơ tơ ƀơ̆p muh măt 400 kang ƀô̆ ăn năm jang pơm Kŏng an xăh sơ lam tơm, krê hơ mơt găh tơ drong sơ đơ̆ng. Jang kiơ̆ trong jang hơ tŏk loi dơ̆ng khŭl linh kơ tă iung jang, hue lăng găh tơ ring, hơ met ming dơ̆ng khŭl kang ƀô̆ tơ̆ rim anih jang kŏng an păng pơ jing Kŏng an xăh chính quy, Anih tơm vei lăng Kŏng an hlôi tơ lĕch trong vă jang ăn kang ƀô̆ tŏk bŏk bơ̆ jang tơ̆ dôm anih jang găh Anih tơm vei lăng Kŏng an vih bơ̆ jang tơ̆ Kŏng an xăh sơ lam tơm, krê hơ mơt găh tơ drong sơ đơ̆ng.

Kơ dră tơm Tô Lâm asong tơ mam ăn đe kang ƀô̆ khŭl linh

Pơ ma tơ̆ jơ tơ ƀơ̆p muh măt, Kơ dră tơm Tô Lâm pơ ma hơ dăh, trong jang ăn kang ƀô̆ năm jang ưh khan lăp vă hơ tŏk dơ̆ng khŭl jang ăn Kŏng an xăh mă hơ dai hăm ‘noh oei pơm tơ drong hiôk vă rim bơ ngai jang đei băt, pơ hrăm, pơ long lăng, tơ mơ̆t dơ̆ng tơ drong hlôh vao yan âu. Kơ dră tơm athei kang ƀô̆ đei ăn năm pơm Kŏng an xăh sơ lam kăl kơ tơ tĕnh hơ met pơ ‘lơ̆ng mơ mat tat, jăh mơ̆t hơ dai hăm hơ nih bơ̆ jang ‘nao păng bơ̆ jang hloi lơ̆m jang kiơ̆ hơ năp jang đei pơ jao.

Thuem: Tơ blơ̆