VOV4.Bahnar - Tơ̆ hơ năp tơ drong krê hơ mơt đơ̆ng jĭ Covid-19, ‘năr 29/7, đơ̆ng kơ sô̆ jên mong akŏm đei, Anih Trung ương Mặt trận Tổ quốc Việt Nam tơ lĕch 46 ti hlak jên tơ gŭm ăn tơ drong tang găn jĭ păng Anih mong jên răt vaccine tang găn jĭ Covid-19.

Mă hơ dăh, Anih Trung ương MTTQ Việt Nam tơ lĕch 23 ti hlak jên đơ̆ng kơ sô̆ jên tơ gŭm kơ Grŭp jang Panko ăn Anih MTTQ Việt Nam plt Hồ Chí Minh vă tơ gŭm ăn tơ drong tang găn jĭ Covid-19 tơ̆ plt Hồ Chí Minh; klăih song ăn Hnam pơ gang Nhi Trung ương 1,5 ti păng Anih jang pơ gang plt Thuận An, dêh char Bình Dương 1,5 ti hlak jên vă dôm anih âu răt tơ mam, pơ gang tang găn jĭ păng tơ gŭm ăn đe y, ƀak si, bơ ngai jang pơ gang vang hơ met ăn bơ ngai jĭ Covid-19.

Atŭm hăm ‘nŏh tơ lĕch 20 ti hlak jên ăn Anih mong jên vaccine tang găn jĭ Covid-19 yoa Anih tơm vei lăng jên hu vei lăng. Truh dang ei, kơ sô̆ jên Anih Trung ương MTTQ Việt Nam gơih ăn Anih mong jên vaccine tang găn jĭ Covid-19 đĭ tŏk hlŏh 1.043 ti hlak jên bơih.

Dơ̆ng: Tơ blơ̆