VOV4.Bahnar - Ƀơm truh tơ drong hơ tŏk kơ jă kit set hơ len jĭ Covid -19 đơ̆ng Công ty jang hơ doi găh kơ măy Việt Á (Công ty Việt Á), pơ gê 21/12, ƀok Nay Phi La, Kơ dră vei lăng jang pơ ghang dêh char Dak Lak pơ ma hơ dăh, dêh char răt hlŏh 20 rơ bâu kít set hơ len jĭ Covid-19 đơ̆ng Công ty âu, hăm kơ jă 370 rơ bâu 1 kit. Tơ drong răt đei pơm kiơ̆ dôm tơ drong hơ găt, ưh đei tơ drong glăi.

Kit set hơ len jĭ Covid-19 đơ̆ng Công ty Việt Á

Găh tơ drong pơm hla ar răt, ƀok Nay Phi La pơ ma hơ dăh: Tơ drong răt kit set hơ len jĭ covid-19 tơ̆ dêh char đei CDC chih tơ lĕch trong ngăl. Đơ̆ng rŏng kơ ‘nŏh, tơ roi ăn Anih vei lăng jang pơ gang dêh char ƀlă đơ̆ng nŏh tơ roi ăn Dơ nŏ anih vei lăng kon pơ lei dêh char Dak Lak kĭ ăn. Đơ̆ng rŏng kơ ‘nŏh, CDC Dak Lak thuê anih jang kơ dih hơ len năng kơ jă răt păng tơ roi ăn Anih vei lăng jên hu dêh char hơ len, kĭ ăn. Đang kơ ‘nŏh hla ar đei gơih ăn Anih tơ lĕch nơ̆r sơ kơ̆t, tơ mât jên jang kơ dêh char hơ len năng dơ̆ng trong pơm hla ar, đang ‘mơ̆i mă CDC gơ̆h răt. Dôm hơ yak jang lăp hăm tơ drong hơ găt ngăl.

Dơ̆ng: Tơ blơ̆