VOV4.Bahnar - ‘Năr 13/5, Anih vei lăng pôk rơih tĕh đak pơ gơ̆r dăr lăng tơ drong hơ met ăn pôk rơih tơ̆ lơ tơ ring lơ̆m tĕh đak, vă pơm ‘lơ̆ng ăn năr pôk rơih gơ̆h pơ gơ̆r sơ đơ̆ng ‘lơ̆ng. Khul dăr lăng đơ̆ng Anih chĕp kơ̆l pơ gơ̆r Kuô̆k hô̆i, Anih vei lăng pôk rơih tĕh đak yoa Phŏ Kơ dră tĕh đak, Phŏ Kơ dră Anih vei lăng pôk rơih tĕh đak Võ Thị Ánh Xuân chĕp kơ̆l hlôi bơ̆ jang hăm dêh char Dak Nông.

Thượng tướng Nguyễn Văn Được, Kơ dră Jơ nŭm khul linh so Việt Nam, Kơ dră jang lơ̆m Anih vei lăng pôk rơih tĕh đak pơ ma lơ̆m jơ bơ̆ jang

Hơ dai lơ̆m năr, Khul dăr lăng đơ̆ng Anih chĕp kơ̆l pơ gơ̆r Kuô̆k hô̆i, Anih vei lăng pôk rơih tĕh đak yoa Thượng tướng Nguyễn Văn Được, Kơ dră Jơ nŭm khul linh so Việt Nam, Kơ dră jang lơ̆m Anih vei lăng pôk rơih tĕh đak chĕp kơ̆l đei jơ bơ̆ jang hăm Anih vei lăng pôk rơih dêh char Dak Lak găh tơ drong pôk rơih.

Thượng tướng Nguyễn Văn Được tơ chĕng ‘lơ̆ng dôm tơ drong mă Anih vei lăng pôk rơih dêh char Dak Lak hlôi jang đei. Atŭm hăm ‘nŏh, athei dêh char Dak Lak hơ nơ̆ng jang kiơ̆ tôm hla ar chih pơ tho đơ̆ng Trung ương, đơ̆ng dêh char, apŭng, xăh găh tơ drong pôk rơih.

Tơ rĕk truh tơ drong sơ đơ̆ng, tơ tom tang găn dôm tơ drong phă ngơ̆r pôk rơih; kơ chăng hơ len năng rim tơ drong, tang găn rim tơ drong ‘mĕh phă ngơ̆r đơ̆ng rim khul kơ nê̆, vei lăng kơ jăp ‘lơ̆ng tơ drong sơ đơ̆ng tơ̆ rim tơ ring kăl. Rim anih jang kơ pal, tơ ring tơ rang vang jang hơ doi hrơ̆ch ‘lơ̆ng, pơ jao tơ drong jang mă rơ đăh, pơm ăn tơ drong pôk rơih gơ̆h pơ gơ̆r tơ păt ‘lơ̆ng, trŏ luơ̆t păng tang găn ‘lơ̆ng tơ drong jĭ.

Dơ̆ng: Tơ blơ̆