VOV4.Bahnar – Tơdrong ming man pơnơ̆ đak Krông Pách thươ̆ng, dêh char Đăk Lăk jing tơdrong pơkăp jang tih, đei jên axong jang hloh 4.400  tih hlj, mă lei tơhlăk lơ tơdrong lơ̆m 12 xơnăm tơlĕch ming man, duh oei lơ tơhlăk tơhlĭn. Tơhlăk tih hloh lơ̆m khei năr dang ei noh tơdrong yông kon pơlei truh oei anih xơđơ̆ng. Bơngai 'meh jăk noh tam mă đei anih vă jăk, bơngai jăk bơih noh ưh xơđơ̆ng găh tơdrong erih 'nao. Lơ̆m kơplăh noh, khei tơm kơ pơyan 'mi hăm lơ tơdrong hli hlơt tŏk bŏk jê̆ truh.

          Ƀok Vàng Seo Pao jing minh lơ̆m dôm unh hnam mă blŭng tơ̆ tơring dơnâu đak Krông Pách thươ̆ng, xăh Cư San, apŭng M’Drak truh oei anih yông 'nao kơsô̆ 1, xăh Cư Elang, apŭng Ea Kar, dêh char Đăk Lăk. Ƀok Pao đei pôk jang phŏ kơdră thôn tơdăng lơ̆m khei năr gô tơ iung pơjing thôn tơm. Ƀok ăn tơbăt, khei năr blŭng, kơsô̆ unh hnam truh oei tơ̆ âu lơ, mă lei dang ei ưh gan đei bơngai truh, minh giĕng noh minh ƀar unh hnam đĕch. Tơdrong tơm tơrĕk truh tơdrong axong teh choh jang ăn kon pơlei. Minh ƀar unh hnam pơtơm axong đei teh oei, tam mă đei axong ăn teh choh jang. Minh ƀar unh hnam đei axong teh choh jang mă lei tam mă tôm măh kiơ̆ pơkăp đơ̆ng dêh char. Lơ̆m kơplăh noh, đei unh hnam đei axong teh noh kon pơlei tơ̆ tơring truh tơgar ưh kơ khĭn choh jang. Ƀok Vàng Seo Pao pơngơ̆t kơ đon akhan, tơdrong âu gô pơm tơnap ăn tơdrong chă yông kon pơlei lơ̆m khei năr truh: “Minh ƀar bơngai năm tơ̆ âu, unh hnam hlôi truh oei mă lei na ưh đei vă jang, teh noh duh ưh kơ ƀôh tơ̆ yơ. Dang ei oei tam mă pơ 'nguaih teh tơmăn, tam mă chôk pơ 'nguaih. Lơ bơngai akhan dang ei athei pơkăl Anih iŏk jang kơ dêh char dăh tenh kuăng chôk tơmăn teh vă pơyan đơ̆ng rŏng đei teh pơm jang, oei hơnơ̆ng thoi âu nhôn ưh kơ băt erih thoi yơ bơih. Jơnŭm pơgơ̆r jang kơ dêh char pơm jang thoi yơ mă tơdrong iĕ tam mă jang keh noh oei 500 unh hnam nai to xek tơlang thoi yơ.”

Ƀok Trần Văn Thanh, Kơdră Anih vei lăng kon pơlei xăh Cư Elang apŭng Ea Kar ăn tơbăt, jô̆ truh năr 19/8, xăh hlôi xơng 130 unh hnam kon pơlei, pơhlom 600 măt bơngai tơ̆ xăh Cư San, apŭng M’Drak truh oei tơ̆ tơring oei xa kơsô̆ 1. Dang ei, đei minh ƀar kon pơlei tơ̆ tơring truh tơgar teh hăm dôm unh hnam đei axong yông oei. Mă xăh hlôi atŭm hăm dôm anih jang kơ apŭng hơlen tơmang, xơkơ̆t bơngai tơgar noh yoch kiơ̆ dôm tơchơ̆t đơ̆ng khôi luơ̆t. Dôm bơngai tơgar ưh kơ chiu, hlôi đei pơtruh ăn anih kŏng ang xek tơlang, adrin ưh đei lê̆ răm truh tơdrong yông oei hăm kon pơlei: “Lơ ‘măng chă tơroi, hơvơn, tơblang, hơvơn năm truh Anih jang xăh vă tơlang, ưh đei bơ̆ng pang kiơ vă đe xư akhan noh jing teh đe xư, mă lei đe xư duh oei pơhnŏng. Hô sơ noh nhôn tŏk bŏk oei keh đang păng tôm bơ̆ng pang vă pơtruh ăn Kŏng ang apŭng xek tơlang kiơ̆ trŏ khôi luơ̆t. Đe xư tơgar noh pơm hiơ̆r jơhngơ̆m bơngai truh oei. Nhôn tơtom hơlêm đon bơnôh kon pơlei, hơlêm kon pơlei noh teh đei pơjao bơih kon pơlei jang đĕch, oei nhôn gô vei vêr păng pơkăp, vei xơđơ̆ng tơpôl păng atŭm hăm kon pơlei pơklaih dôm tơnap tap”

‘Nguaih tơring oei xa kơsô̆ 1, dêh char Đăk Lăk oei axong anih oei ‘nao kơsô̆ 2 ăn kon pơlei tơ̆ tơring iŏk teh bơ̆ dơnâu đak Krông Pach thươ̆ng, tơ̆ xăh Cư Bông, apŭng Ea Kar. Mă lei, kiơ̆ Anih Choh jang xa păng Hơtŏk tơring pơxĕl apŭng Ea Kar, Anih axong oei kơsô̆ 2, duh tam mă gơh xơng kon pơlei kơlih oei gô hrŭ jên teh păng axong ming man tơdrong kăl oei xa.

Găh tơdrong tơm pơm adar yông oei, tang măt ăn anih iŏk jang, ƀok Phạm Văn Hạ, Kơdră Jơnŭm vei hơlen tơdrong ming man choh jang xa păng trong nơnăm Đăk Lăk ăn tơbăt, anih axong oei kơsô̆ 1 păng kơsô̆ 2 adrol ki pơjao ăn Anih vei lăng kon pơlei apŭng Ea Kar (anih iŏk jang xo) pơm jang. Lơ̆m tơdrong tơlĕch jang adrol ki đei lơ tơdrong ưh kơ trŏ, pơm ăn anih iŏk jang đơ̆ng rŏng ƀơm tơnap tap. Tơ̆ anih axong oei kơsô̆ 1, um hơgăt teh tơ̆ mir xă 22 ha păng pơih xă 110 ha hlôi đei Anih vei lăng kon pơlei apŭng Ea Kar tơlĕch chă pơkă teh mă lei truh dang ei tôm file um teh tơm a pă đei oei. Pơm ăn tơnap găh tơdrong hơmet um la kak teh kơlih ưh đei um tơm, pơrăm tih tên truh tơdrong hrŭ jên iŏk teh vă jang. Vă đei tơm a tơlĕch jang, kăl athei pơkă teh hơdrăp dơ̆ng. Hăm Tơring axong oei kơsô̆ 2 dang ei tŏk bŏk oei axong keh đang ming man tơdrong kăl erih xa ăn anih teh oei. Oei teh choh jang, pơtơm ăh jăl pơtruh ăn dôm anih jang kơpal hơlen kĭ pơkăp vă tơplih tơchơ̆t yua teh.

Ƀok Phạm Văn Hạ ăn tơbăt, Anih jang kơpal dêh char, Anih vei lăng kon pơlei dêh char tŏk bŏk pơgơ̆r jang kơjăp, dôm anih jang tŏk bŏk adrin pơm jang vă khŏm mă keh đang ăh jê̆ đĭ xơnăm âu vă iŏk tơring teh bơ̆ dơnâu đak păng axong anih oei xa ăn hloh 700 unh hnam kon pơlei, pơhlom 4.000 măt bơngai. Găh hli kơ đak hơbông, ƀok Hạ ăn tơbăt: “Jê̆ đĭ xơnăm noh tơpă gô ƀơm đak hơbông păng nhôn gô đei trong hơmet tơdrong mă âu. Dang ei, mă kăl noh athei yông kon pơlei, dôm unh hnam ăh đak oei đơ̆ng, pơtih nhen đak ăh 486m jur tơ̆ hơla ăh tŏk blai noh kon pơlei ưh đei ƀơm răm. Kon pơlei oei ăh anih pơkăp noh hlôi đei pơkăp oei tơ̆ nai. Nhôn xơkơ̆t khei năr ưh gơh pơdui đunh, vei xơđơ̆ng ăn kon pơlei hlôi gô lơ̆m 10 xơnăm kơ âu bơih, đe roi vih oei hrôih tơ̆ anih pơkăp oei ‘nao noh roi da ƀiơ̆ hrat hrĭn, tơdrong erih roi hrôih xơđơ̆ng”

Đơ̆ng rŏng 12 xơnăm oei gô, tơdrong ming man pơnơ̆ đak kơ rơbâu tih hlj Krông Pách thươ̆ng hlôi đei hơmet đang, kon pơlei pơtơm drơ̆ng nơ̆r păng truh oei tơ̆ anih ‘nao. Mă lei, tơdrong axong anih oei ‘nao dang ei tŏk bŏk oei ƀơm tơnap tap găh teh bơ̆ hnam păng teh choh jang. Vă kon pơlei xơđơ̆ng truh anih oei ‘nao păng xơđơ̆ng tơdrong erih, dôm jăl pơgơ̆r kơpal kơ dêh char Đăk Lăk kăl hrôih hơmet dôm tơdrong oei tơhlăk tăk dang ei. Tơdrong jang kơjăp kăl đei pơm hơdăh hăm tơdrong jang păng tơnăp đơ̆ng dêh char truh tơ̆ apŭng, xăh, kĕ đei thoi noh pơtơm kĕ hơvơn pơdrơ̆ng nơ̆r đơ̆ng kon pơlei.

Lan chih păng pơre nơ̆r