VOV4.Bahnar - Ƀok Lê Văn Thanh, Phŏ kơ dră Anih tơm vei lăng găh tơ drong jang – lĭnh jĭ rơ ka păng tơ pôl ‘nao đei jơ bơ̆ jang hăm Anih vei lăng kon pơ lei dêh char Dak Lak găh tơ drong hơ len lăng tơ drong bơ̆ jang kiơ̆ rim trong jang tơ gŭm, tơ drong jang găh tơ jur dơ nuh hin, tơ drong jang tơ̆ Dak Lak. Jăl jang 2016-2020 Dak Lak hlôi ‘măn vă jê̆ 900 ti hlak jên ăn tơ drong jang tơm teh đak tơ jur dơ nuh hin kơ jăp. Jên âu hlôi tơ gŭm Dak Lak tơ mơ̆t jên jang thim găh anih jang kăl, tơ gŭm hơ tŏk tơ iung jang sa, pơ̆ih să tơ drong jang tơ jur dơ nuh hin, jang kiơ̆ trong jang tơ gŭm tŏk iŏk jên hơ tŏk tơ iung jang sa, tơ gŭm găh pơ tho pơ hrăm, pơ gang, pơm rơ goh cham char, hnam oei...

Lơ̆m jơ bơ̆ jang

Lơ̆m 5 sơ năm âu ki, vă jê̆ 252 rơ bâu ŭnh hnam dơ nuh hin păng rim bơ ngai teh đak tơ gŭm đei tŏk iŏk jên đơ̆ng anih mong jên tơ gŭm hăm kơ sô̆ jên vă jê̆ 7 rơ bâu ti hlak jên. Ƀok Lê Văn Thanh, Phŏ kơ dră Anih tơm vei lăng găh tơ drong jang sa linh jĭ rơ ka păng tơ pôl lanwg ‘lơ̆ng dôm tơ drong hơ drin lơ̆m tơ drong jang tơ jur dơ nuh hin păng tơ chă ăn tơ drong jang ăn kơ bơ ngai jang tơ̆ Dak Lak, mă lei vă tơ jur dơ nuh hin kơ jăp, Dak Lak kăl athei tơ lĕch ăn tơ drong jang hơ dăh păng athei tơ klep hơ năp jang ăn kơ bơ ngai chĕp kơ̆l kơ rim tơ ring. Hơ dai hăm ‘noh kăl tơ lĕch jang lơ tơ drong jang tơ gŭm kon pơ lei vang jang sa, hơ len lăng tơ drong khŭl bơ ngai jang vă đei trong jang pơ tho hŏk tơ drong jang, tơ gŭm tơ chă tơ drong jang mă lăp.

Thuem: Tơ blơ̆