VOV4.Bahnar - Đơ\ng ro\ng An^h tơm vei lăng jang kơ măy, te\ch mơ dro tơ le\ch tơ drong Tơ chơ\t 648 găh hơ to\k ming kơ jă điên to\k dang 8,36% ‘no\h jên điên kơ lơ unh hnam to\k tôch dêh. Vă băt hơ dăh [iơ\ dôm tơ drong tơm jing hơ to\k kơ jă điên ku\m nhen tơ blang dôm nơ\r tơ tok đơ\ng kon pơ lei găh trong jo# kơ jă điên. Hương Lý hlôi ap^nh jet [ok Trần Văn Thuận, Kơ dră che\p kơ\l công ty jang unh điên Dak Lak găh tơ drong ‘nâu.

-{ok ăi, ‘nao âu, An^h tơm vei lăng jang kơ măy, te\ch mơ dro tơ le\ch tơ drong tơ chơ\t găh hơ to\k ming kơ jă điên, jo# păh lăp to\k 8,36%, ap^nh ih roi mă hơ dăh [iơ\ tơ drong ‘nâu năng?

-{ok Trần Văn Thuận: Găh tơ drong hơ to\k ming kơ jă điên khei ‘năr tơ je# âu. Lơ\m ‘năr 20/3/2019 An^h tơm vei lăng jang kơ măy, te\ch mơ dro tơ le\ch tơ drong tơ chơ\t kơ so# 648 hơ met ming kơ jă te\ch le păng đ^ đăng kơ jă điên. Kiơ\ tơ drong hơ găt ‘nao âu, kơ jă te\ch le điên to\k jo# păh lăp tơ\ đ^ đăng gru\p bơ ngai yoa unh điên ‘no\h 1.864,44 hlak 1 KW, thoi no\h kơ so# jo# păh lăp to\k pơ têng hăm adrol ki ‘no\h 8,36%. Hăm dôm gru\p bơ ngai yoa điên pơ ‘nho\ ăn tơ drong arih, kơ jă ‘nao to\k đơ\ng 8,35 truh 8,38% kiơ\ kơ so# unh điên yoa lơ\m khei dôm yơ. Mă hơ dăh, hăm bơ ngai yoa unh điên dang 100 kWh 1 khei ‘no\h, kơ jă jên điên so đei hloi jên thue# bơih ‘no\h 173.190 hlak, kiơ\ kơ jă ‘nao ‘no\h 187.660 hlak, kiơ\ kơ ‘no\h kơ so# điên to\k lơ [iơ\ kơ jă so 14.465 hlak. To\k dang 8,35%. Hăm bơ ngai yoa unh điên truh 200 KWh 1 khei, jên điên so đei hloi jên thue# bơih ‘no\h 377.575 hlak, oei jo# kiơ\ kơ jă ‘nao ‘no\h 409.200 hlak, plo\h ple\ch kơ plăh kơ so# so hăm kơ so# hle ‘no\h 31.625 hlak, to\k dang 8,38% pơ têng hăm kơ jă so.

-Mă lei kiơ\ 1 kơ so# bơ ngai tơ roi, tơ pă tơ\ yăn âu jên điên khei âu ki to\k tôch lơ pơ têng hăm khei adrol kơ ‘no\h, ro\ năng lơ hlo\h 8,36%, ih tơ blang thoi găh tơ drong ‘nâu?

-{ok Trần Văn Thuận:  Găh tơ drong ‘nâu đei 2 tơ drong tơm. Mă 1, găh tơ drong tơ le\ch hla ar thu jên ưh dôm ăi đơ\ng khei 3 păng khei 4. ‘Măng tơ le\ch hla ar thu jên điên khei 3 jo# lơ\m 28 năr yoa điên, oei khei 4 ‘no\h jo# lơ\m 31 năr yoa điên, plo\h ple\ch băl 3 năr, thoi no\h jên điên lơ\m khei 4 gô to\k thim dang 10,71%. Tơ drong mă 2 ‘no\h yoa ‘năr to\. {ât hơ tuch khei 3, [ât blu\ng khei 4 păng lơ\m khei 4 tơ\ Dak Lak ‘năr tôch to\, tơ\ âu đei năr to\ đơ\ng 37 – 40°C jing đei tơ drong yoa điên to\k kiơ\. Hơ len năng lơ\m dôm năr to\ kơ tang, Công ty jang unh điên Đắk Lắk [ôh kơ so# unh điên đie yoa 1 năr lơ\m dôm năr to\ ‘no\h 6,98 triu kWh 1 năr, oei dôm năr hmă adrol ki lăp 6,05 triu kwh 1 năr. Thoi no\h kơ so# to\k yoa ‘năr to\, kon pơ lei yoa unh điên to\k truh 15,2 %.

-Lei a, vă găn [iơ\ tơ drong nôp jên điên lơ hlo\h tơ drong, ih hăm đei nơ\r tơ tă kiơ\ hăm kon pơ lei ưh?

-{ok Trần Văn Thuận:  Hrei ‘nâu, công ty jang unh điên Dak Lak hlôi cho# kơ măy pơ to\ đơ\ng hơ tăih ăn bơ ngai yoa điên, rim bơ ngai gơ\h lăng hơ len kơ so# unh điên đei yoa rim năr đơ\ng kơ dih, dăh mă kơ so# unh điên rim khei kiơ\ trang Web www.cskh.vn. Trang Web âu chih tôch rơ đăh păng bơ ngai yoa điên gơ\h jo# păng hơ len năng jên điên kơ dih. ‘Ngoăih kơ ‘no\h hrei ‘nâu, tơ\ dêh char unh điên măt ‘năr pơm kơ pal bơ bu\ng hnam, m^nh [ar tơ drong jang hlôi đei tơ mât yoa păng 1 kơ so# kon pơ lei hlôi pơ lăp unh điên măt ‘năr tơ\ kơ pal bơ bu\ng hnam, tơ drong ‘nâu công ty jang unh điên Dak Lak hlôi đei hla ar pơ tho păng tơ gu\m, pơm hla ar pơ kăp hăm bơ ngai răt yoa, mưh yoa ưh đ^ ‘no\h tơ mât lơ\m tơ lei unh điên atu\m dơ\ng kiơ\ đơ\ng cho# công tơ vih vât 2 pang. Tơ dăh bu ‘me\h pơ lăp unh điên măt ‘năr tơ\ bơ bu\ng hnam ‘no\h công ty jang unh điên Dak Lak gô tơ gu\m cho# ăn.

-Lei, [ok ăi, hăm dôm nơ\r tơ tok đơ\nng kon pơ lei [ơm truh kơ jă điên ‘no\h đei sek tơ lang thoi yơ păng kon pơ lei athei ap^nh hơ len tơ\ yơ?

-{ok Trần Văn Thuận:  Lơ\m khei ‘năr răt yoa unh điên, rim tơ drong ưh kơ lăp [ơm truh jên điên ku\m nhen kơ so# điên đei yoa dăh mă nơ\r ap^nh hơ len đơ\ng bơ ngai răt yoa điên athei krao điên thoăi ăn An^h vei lăng bơ ngai răt yoa, kơ so# 1900 1909 ‘no\h công ty jang unh điên Dak Lak gô tơl tơ blang hre\nh hlo\h tơ dăh gơ\h, thoi tơ drong tơ tok jên điên to\k, công ty gô tơl tơ blang lơ\m 24h vă bơ\ jang hăm bơ ngai răt yoa hơ len, băt hơ dăh.

-Lei a, bơ nê kơ ih [ok hơ!

Hương Lý: Chih

Dơ\ng: Tơ blơ\