Tơ̆ plei Vĩnh Trường, xăh Phước Dinh, dêh char Khánh Hòa, lơ ŭnh hnam kon pơlei tŏk bŏk hơmet ăn pôk rĭ vă pơjao teh ming man Hnam kơmăy ŭnh điên hạt nhân Ninh Thuận 1. Tơdrong kon pơlei bơngơ̆t truh hloh kơplăh âu ‘noh jĭ kơsô̆ jên hrŭ ‘mong, tơgŭm păng tơdrong hơmet ăn oei tơ̆ plei hle mưh tơplih truh tơ̆ hơnih oei ‘nao. Ƀok Nguyễn Văn Trong, kon pơlei xăh Phước Dinh tơbăt, ƀơ̆t băt khei 3 âu ki, Quốc hội hlôi tơlĕch trong jang, tơdrong tơgŭm ‘nao vă hơmet pơ ‘lơ̆ng dôm tơdrong tơhlăk ăn tơdrong hrŭ ‘mong, iŏk teh, hơmet ‘lơ̆ng nơ̆r apĭnh hơdrol ‘noh, bơngai tăh hla tôch kơ chhôk ‘nă.

“Teh đak hrŭ ‘mong đei yua ăn kon pơlei, kon pơlei chhôk ‘nă dêh. Teh đak hrŭ ‘mong, tơgŭm ‘lơ̆ng hloh ăn kon pơlei vă kon jên tŏk tơ̆ hơnih oei ‘nao hơtŏk tơiung ‘lơ̆ng, ưh pă đei bu dơnuh hin hơlơ̆k dơ̆ng.

Kŭm hăm tơdrong jang sa păng hơnih oei ‘nao, tơdrong pôk rĭ, pơm hơmet ming pơsat yă ƀok sơ̆ ‘noh jĭ tơdrong pơm ăn lơ kon pơlei tơring tơdrong jang tôch kơ tơtăm. Hăm đe sư, ‘nâu ưh khan lăp jing tơdrong pôk rĭ pơsat đĕch, mă oei ƀơm truh tơdrong lui kơyang, tơdrong joăt păng tơdrong pơyom ‘măn ăn bơngai đĭ lôch. Yua thoi noh, kon pơlei ‘meh vă tơdrong bơ̆jang kiơ̆ athei đei khei ‘năr hơmet ăn mă ‘lơ̆ng, trŏ lăp hăm tơdrong joăt oei sa kơ tơring. Ƀok Nguyễn Thanh Hiệp, kon pơlei tơring tơdrong jang, xăh Phước Dinh tơroi nơ̆r athei:

“Ŭnh hnam nhôn đei 6 tŏ pơsat pôk rĭ, ĭnh kŭm ling lang pơm kiơ̆ trong jang đơ̆ng Đảng păng Teh đak pơjao teh ming man hnam kơmăy hạt nhân Ninh Thuận 1. Khei soi hơmet pơ ‘lơ̆ng pơsat âu kŭm vă jê̆ đĭ bơih ‘noh ĭnh kŭm athei xăh jăh tơtĕnh asong iŏk kơsô̆, vă kon pơlei đei hơmet ăn mă ‘lơ̆ng”.

Hơtuch khei 3 âu ki, Anih chĕp kơ̆l pơgơ̆r Quốc hội tơlĕch ăn Tơdrong tơchơ̆t tơmơ̆t dơ̆ng, hơmet ming 1,2 trong jang, tơgŭm gĭt kăl lơ̆m tơmơ̆t jên jang ming man tơdrong jang ŭnh điên hạt nhân Ninh Thuận. Kiơ̆ đơ̆ng noh chih pơkeh khôi luơ̆t găh hrŭ ‘mong, tơgŭm păng ăn oei tơ̆ plei hla, hơdai hăm vei sơđơ̆ng tôch ai tơdrong đei yua ăn kon pơlei lơ̆m tơdrong jang. Kiơ̆ kơ tơdrong hơgăt ‘nao, dôm ŭnh hnam đei tôm tơdrong hiôk gô đei pơjao teh tơ̆ hơnih oei hle păng đei ăn đĕch 100% jên iŏk yua teh. Hăm teh choh jang sa ưh kơ sĭ teh ƀa hlôi tơplih iŏk yua lơ̆m tơpă yan âu mă lei tam mă tom pơm hla ar tơplih, Teh đak oei lăng hrŭ ‘mong kiơ̆ teh iŏk yua.

 Ƀok Nguyễn Văn Quế, Kơdră Anih vei lăng kon pơlei xăh Vĩnh Hải tơbăt, gơnang đơ̆ng trong jang, tơdrong tơgŭm ‘nao, tơdrong jang hrŭ ‘mong, iŏk teh đơ̆ng tơdrong jang Hnam kơmăy ŭnh điên hạt nhân Ninh Thuận 2 tŏk bŏk đei tŭn hrĕnh.

“Đĭ đăng tơdrong jang jô̆ hơlen, hla ar iŏk yua teh truh dang ei hlôi jang đang, nhôn hlôi athei khŭl jang tơ̆ hơla iŏk kơjă kiơ̆ tơdrong Tơchơ̆t 121 ‘nao hloh. Akŏm kơsô̆ dôm bơngai đei tôm tơdrong hiôk tơbăt hơdăh ‘noh 487 ŭnh hnam”

Kiơ̆ kơ ƀok Nguyễn Văn Nhựt, Kơdră Anih vei lăng găh Kơmăt kơmŏk, Tĕch mơdro dêh char Khánh Hòa, akŏm hơgăt teh iŏk pơdreo vă ming man Hnam kơmăy ŭnh điên hạt nhân Ninh Thuận 1 păng Hnam kơmăy ŭnh điên hạt nhân Ninh Thuận 2 ‘noh hloh 760 hek tar, hăm vă jê̆ 1.400 ŭnh hnam kon pơlei athei pôk rĭ oei tơ̆ nai. Tơdrong Quốc hội tơlĕch ăn Tơdrong tơchơ̆t 121 hlôi hơmet pơ ‘lơ̆ng lơ tơdrong tơhlăk lơ̆m hrŭ ‘mong, tơgŭm păng ăn oei tơ̆ plei hle. Gơnang đơ̆ng noh, tơdrong jang iŏk teh tơ̆ rim tơring tŏk bŏk đei tŭn hrĕnh, pơm dơ̆ng tơdrong drơ̆ng lăp lơ̆m kon pơlei. Dang ei dêh char Khánh Hòa tŏk bŏk tơlĕch jang kiơ̆ jơhngơ̆m đon tơtĕnh, hơdrin jang đang iŏk teh hơdrol kơ hơtuch khei 6 sơnăm ‘nâu vă pơjao ăn tơ ‘ngla tơmơ̆t jên jang tơlĕch jang tơdrong jang.

“Tơdrong tơchơ̆t âu hlôi hơmet pơ ‘lơ̆ng tôch kơ lơ, mă loi ‘noh jĭ dôm nơ̆r apĭnh đơ̆ng dêh char Khánh Hòa, hơnơ̆ng pơm hơdăh ‘lơ̆ng hloh păng hơdai hloh hăm bơngai tơpă lơ̆m kơplăh hrŭ ‘mong. Yua  thoi noh, bơ̆jang kiơ̆ hrŭ ‘mong, iŏk teh hrĕnh hloh, iŏk đei tơdrong drơ̆ng lăp đơ̆ng kon pơlei. Hrei ‘nâu dêh char tŏk bŏk akŏm kơtang, hăt hot dăr hơlen păng iŏk kơjă kiơ̆ trong jang hrŭ ‘mong vă kla ăn kon pơlei lơ̆m khei ‘năr kơđeh hloh”.