Kiơ̆ kơ noh, jơ pơm jang ‘nao iŏk yua hăm rim hơnih jang Đảng, Hơnih jang teh đak, Măt trâ̆n Tôh kuô̆k păng jơnŭm jang tơpôl đơ̆ng dêh char truh tơ̆ xah đei: ah pơgê pơtơm 7 jơ 30 pơnĭt truh 11 jơ 30 pơnĭt; ah kơsơ̆ đơ̆ng 1 jơ 30 pơnĭt truh 5 jơ 30 pơnĭt. Pơtêng hăm pơkăp oei yua dang ei, jơ pơtơm pơm jang ah pơgê noh gô hrôih hloh 30 pơnĭt, jơ pơtôch pơm jang ah kơsơ̆ adoi klui hloh 30 pơnĭt. Hơnih jang vei lăng kon pơlei dêh char Đăk Lăk ăn tơbăt, tơdrong hơmet mă ou vă pơm kơđeh ƀiơ̆ tơdrong ưh hơtŏ hăm jơ pơm jang kơ Jơnŭm pơgơ̆r teh đak păng rim hơnih jang tơm, hơnih jang Trung ương (hơnơ̆ng noh pơtơm đơ̆ng 8 jơ pơgê). ‘Nguaih kơ noh, tơdrong pơkăp jơ pơm jang hrôih hloh ah pơgê đei lăng jing trŏ hăm tŏ ‘mi kial păng pơkăp atŭm ah mă dang ei đei tong hơnê̆ dêh char, pơlei tơm lơ̆m jơ̆p teh đak iŏk yua jơ pơkăp le lăi băl.

Hăm dôm tơdrong jang kăp gĭt nai nhen pơtho pơhrăm, jang pơgang hơmet jĭ jăn, hơnih jang nai gô kơdih hơmet jơ pơm jang vă trŏ hăm tơdrong jang pơtho pơhrăm, khăm hơmet jĭ jăn.