Chă mơ̆ng tơpăt dôm nơ̆r pơma, apinh, tơdrong hơpơi ‘mĕh đơ̆ng lơ ‘nhŏng oh công nhân, Tổng Bí thư, Kơdră teh đak Tô Lâm tơƀôh đon hơiă yoa ƀôh lơ bơngai jang rơgei, tơnăp ‘lơ̆ng, tơƀôh hơdăh tơdrong ‘lơ̆ng hơiă đơ̆ng bơngai công nhân Việt Nam hrei ‘nâu: pơnam, adrin, bơ̆ jang, arih xa tơnăp, băt ‘mêm unh hnam, bơ̆ jang ‘lơ̆ng hăm bôl boăl, hăm anih tĕch mơdro, hăm khul Công đoàn păng teh đak.

Tổng Bí thư, Kơdră teh đak pơma hơdăh, Đảng păng teh đak hơnơ̆ng chih hơdăh khul công nhân jĭ khul jang tôch gĭt kăl lơ̆m tơdrong tơiung pơjing păng vei lăng teh đak. Lơ̆m rim chăl jang kăch mang, công nhân Việt Nam hơnơ̆ng đei măt tơ̆ dôm anih pơmat tat, tơ̆ dôm anih jang gleh hrat, lơ̆m hnam kơmăy, tơring jang kơmăy, lơ̆m dôm tơdrong bơ̆ jang, pơvih pơvăn, chơ chuĕn, jang kơmăy kơmok, pơm tơlĕch tơmam. Tơpang ti, kơl ‘ngok, đak pơ uh pơgang păng đon rơgei đơ̆ng đe ‘nhŏng oh vang tơgop pơjing đei lơ tơdrong jơnei mưh jang atŏk tơiung teh đak hrei ‘nâu.

Tổng Bí thư, Kơdră teh đak Tô Lâm athei hơnơ̆ng năng tơdrong vei lăng ‘lơ̆ng tơdrong arih xa ăn công nhân, bơngai jang ‘nŏh jĭ 1 tơdrong jang chinh trĭ gĭt kăl, jang hơnơ̆ng păng đunh đai. Plt athei hơlen năng dơ̆ng tơdrong ‘mĕh vă găh hnam oei lơ̆m tơpôl, anih oei xa kơ công nhân, hnam trưng, hnam vei rong hơioh, hnam pơgang, tơmam yoa vă joh ayŏ kơ dŏ xoang, anih ngôi pơchơt ăn tơpôl tơ̆ dôm tơring jang kơmăy, Hnam kơmăy pơm tơmam tĕch tơ̆ teh đak đe păng dôm tơring đei lơ công nhân arih xa. Athei pơm thoi yơ vă công nhân ưh lăp bơ̆ jang đĕch, mă oei đei anih oei xa sơđơ̆ng ‘lơ̆ng; ưh lăp đei jên khei đĕch, mă oei đei tơdrong ‘lơ̆ng vă pơtho ăn kơ kon hơ ‘lơ̆p, vei lăng mĕ ƀă tơ̆ pơlei; ưh lăp bơ̆ jang đĕch mă oei đei pơdơ̆h ngôi, hŏk pơhrăm, ngôi pơchơt, pơm hơtŏk tơdrong arih xa găh jơhngâm đon.