Khei năr ou ki, Hơnih tơm Asong jang Việt Nam hlôi tơlĕch lơ trong jang drơ̆ng minh, pơm kiơ̆ dôm tơchơ̆t tơlĕch lơ̆m tơdrong pơma đam, pơma dơnuh lơ̆m khul jang păng hlôi đei iŏk jơnei hơdah. Truh dang ei, tơdrong pơdrơ̆ng pơm jang atŭm đei hloh 85% kơsô̆ bơngai jang tơ̆ dôm hơnih jang mŭk drăm, hơnih jang đei jơnŭm kŏng đoan. Pơma ah 'măng tơƀơ̆p, Phŏ Kơdră teh đak bơ̆n Võ Thị Ánh Xuân bơnê kơ khŭl kang ƀô̆ kŏng đoan tơ̆ tơring pơma atŭm păng 101 kang ƀô̆ kŏng đoan tơ̆ tơring jang hơgei lơ̆m tơdrong pơma đam khŭl jang pơma hơdrô̆ păng khei năr ou ki tơgŭm hloh 382 rơbou bơngai jang đei xa yua hăm kơsô̆ jên hloh 6 rơbou tih hlj minh sơnăm.

Phŏ Kơdră teh đak bơ̆n sơkơ̆t hơdah, dôm tơdrong jang đei jơnei ou hlôi tơgŭm ăn bơngai jang đei tơdrong hơrih tơnăp hloh, sơđơ̆ng tơdrong jang, jing trong vă bơngai jang lui ngeh hăm hơnih jang công đoàn, kiơ̆ đơ̆ng noh sơkơ̆t hơnih sơnong jang kơ Công đoàn lơ̆m tơdrong jang păng hơnih jang chinh trĭ. Phŏ Kơdră teh đak bơ̆n Võ Thị Ánh Xuân pơgơ̆r hăm Hơnih tơm Asong pơm jang Việt Nam pơtoi tơplih 'nao kơtang hloh tơdrong pơgơ̆r păng trong pơm jang kŏng đoan kiơ̆ pơkăp bot 'lơ̆ng, đei jơnei tơnăp, hơyak kơtang tơ̆ tơring, iŏk đoan viên păng bơngai jang pơm tơm. Atŭm hăm noh hơtŏk ‘lơ̆ng tơdrong tang măt, tơgŭm vei lăng tơdrong pơyua trŏ ƀlep ăn bơngai jang; tơtom băt hơdah tơdrong hơpơi ‘meh, sek tơlang dôm tơdrong pơngơ̆t kơ đon đơ̆ng tơring, tơgop hơtŏk đon lui păng hơtŏk tơdrong tơguăt tơguăl tôm kon pơlei.