Lơ̆m anih jang kơ Công ty pơm pơsei Asean (Tơring jang kơmăy Hòa Phú, dêh char Đắk Lắk), ‘nhŏng Lê Trung Hiếu kŭm hăm 3 ‘nu bơngai jang nai oei bơ̆ jang ƀât kơmăy pơm pơsei. Adrol ki vă jang hăm kơmăy âu kăl đei đơ̆ng 5 - 7 ‘nu công nhân, mă lei đơ̆ng rŏng kơ ‘nhŏng Lê Trung Hiếu pơm đei kơmăy hlôm ôxy kơdih tơ̆ âu, tơdrong bơ̆ jang lăp kăl đei 4 ‘nu bơngai đĕch.

“Tơdrong thu hlôm ôxy ‘nŏh jang hăm kơdih bơ̆n, công nhân athei dơ̆ng jê̆ kơmăy ƀuh, iŏk ming đing hlôm ôxy ƀât kơmăy ƀuh, tôch hơmơt yoa tôch tŏ, hơmơt pơsei kơcheh prăh tơ̆ bơngai. Đơ̆ng noh, inh tơchĕng chă trong pơm kơmăy hlôm hăm điên, gơh pĭt pơih đơ̆ng hơtăih. Pơm đang, ‘nhŏng oh gơ̆h dơ̆ng atăih sơđơ̆ng ‘lơ̆ng vă bơ̆ jang, đei yoa hai, huei đei tơdrong krê hơmơt hai.”  

Công ty pơm pơsei Asean dang ei đei 340 ‘nu đoàn viên, bơ̆ jang tơ̆ 2 khul công đoàn. Kiơ̆ ƀok Nguyễn Hữu Thống, Kơdră vei lăng Công đoàn tơ̆ công ty, lơ̆m anih jang pơm pơsei, tơdrong pơcheh đei ki thuơ̆t ‘nŏh tôch gĭt kăl vang tơgop tơgŭm ‘mơ ‘met đei jên jang, hơtŏk tơdrong đei yoa păng pơm đei tơmam ‘lơ̆ng. Anih jang hơnơ̆ng pơlung bơngai jang tơplih ‘nao, rơgei vă pơm hơtŏk kơsư̆k pơjei. Đơ̆ng noh, lơ kỹ sư, công nhân đei tơdrong pơcheh tôch đei yoa; hơdrô̆ ‘nhŏng Lê Trung Hiếu đei 3 tơdrong pơcheh rơgei ‘nŏh jĭ pơm kơmăy ƀôm đak ‘mơ ‘met unh điên, hơmet ming ‘long hyup điên păng pơm đing hlôm ôxy, atŭm hăm ‘nŏh oei tơchĕng hơlen hơmet ming unh điên tơ̆k hơdăh.

Ƀok Thông tơroi: “Dôm tơdrong pơchĕh đơ̆ng ‘nhŏng Hiếu vang tơgop tôch ‘lơ̆ng ăn jên jang, jang đei tơmam roi ‘lơ̆ng, hơtŏk tơdrong tơplih ‘nao, vang tơgop tơgŭm ăn anih tĕch mơdro jang tŏk pran kơjăp.”

Ƀât mă ‘nhŏng Lê Trung Hiếu oei bơ̆  jang tôch rơgei lơ̆m hnam kơmăy ‘nŏh mŏ H’Chuyên Niê, hăm tơdrong jang kăt kơtăk cao su, kŭm vang tơgop tôch ‘lơ̆ng tơ̆ pơgar ‘long. Jĭ công nhân tơ̆ mir đak lar cao su Phú Xuân, đei 10 sơnăm bơ̆ jang, mŏ H’Chuyên hơnơ̆ng jang đang 'lơ̆ng tơdrong jang kơdih. Mŏ hơnơ̆ng bơ̆ jang, iŏk đei tơmam lơ hlŏh dang 20% pơting hăm kơsô̆ jô̆ atŭm đơ̆ng rim bơngai jang.

Mŏ H'Chuyên tơroi: “Inh athei adrin iung đơ̆ng hrôih, drôih đơ̆ng măng mă ưh ‘nŏh brok klui ƀiơ̆ kơ đe công nhân nai. Mưh kăt kuôih kơtăk ‘nŏh athei bơ̆ jang mă hơlen, ưh gơ̆h jang hăt hot vă kơtăk huei lĕch tơ̆ ‘ngoăih. Săng kăt năr yơ kŭm athei pat hơmet mă han, dôm tơmam yoa nhen pơnhan, pup, ‘long tơjră dăh mă tơlei chô̆ athei hơmet mă tôm.”

Lơ̆m dêh char Đắk Lắk dang ei đei vă jê̆ 62 rơbâu ‘nu đoàn viên công đoàn, bơ̆ juang tơ̆ hlŏh 1.350 khul Công đoàn. Dôm sơnăm âu ki, tơdrong pơjei băl bơ̆ jang đei tơlĕch ‘lơ̆ng tơ̆ rim anih, sơng đei lơ đoàn viên vang jang, kiơ̆ đơ̆ng nŏh akŏm đei rơbâu tơdrong pơcheh rơgei găh ki thuơ̆t đei tơlĕch jang kiơ̆ tơ̆ yăn âu, vang tơgop pơm hơtŏk tơdrong đei yoa mưh bơ̆ jang, tĕch mơdro.

Vă pơlung jơhngâm đon tơplih ‘nao, Liên đoàn Lao động dêh char Đắk Lắk hơnơ̆ng pôk pơ ư, hơpăh tơmam tơtom ăn dôm bơngai jang rơgei. Ƀok Nguyễn Phú Lập – Phŏ Kơdră vei lăng Liên đoàn Lao động dêh char Đắk Lắk ăn tơbăt: “Sơnăm ‘nâu, hăm tơdrong jang rơgei ‘lơ̆ng, Liên đoàn Lao động dêh char tơlĕch trong jang păng đei hla ar pơtho ăn công đoàn tơ̆ tơring vă kơchăng pơlung bơngai jang jang mă tơnăp, vang pơjei băl bơ̆ jang, dar deh pơjing tơring jang tŏk roi đunh roi pran. Lơ̆m khei Công nhân, nhôn jang hơdoi hăm Anih jang Nội vụ dêh char pơgơ̆r “Năr Công nhân” tơ̆ Tơring jang kơmăy Hòa Hiệp (phường Hoà Hiệp) lơ̆m ‘năr 5/5 hăm hlŏh 3.000 ‘nu bơngai vang akŏm. Hơmĕng sơnăm ‘nâu gô đei lơ jên, tơmam vă tơgŭm lơ ƀiơ̆ ăn bơngai jang.”

Lơ̆m khei ‘năr oei hăt bơ̆ jang tơplih ‘nao păng tơplih hăm kơmăy sô̆, đe công nhân nhen ‘nhŏng Lê Trung Hiếu păng mŏ H’Chuyên Niê tŏk bŏk tơƀôh hơdăh kơjă kăp gĭt hăm đon jang rơpgei păng tôch tơnăp. Đơ̆ng hnam kơmăy pơm pơsei truh mir đak lar cao su, dôm tơdrong pơcheh rơgei păng đon adrin đơ̆ng đe sư oei tơgop pơm hơtŏk tơdrong đei yoa mưh bơ̆ jang păng jang kiơ̆ kơmăy kơmŏk ‘nao./.