Hăm hơnăn “Đăk Lăk – mŭk drăm, hơpơi 'meh hơtŏk tơ-iung”, Hop akŏm Tơlĕch jang sơnăm 2026 kơ dêh char gô vă sơng đei 1.000 'nu tang măt lơ̆m teh đak păng đơ̆ng teh đak đe truh. Tơdrong jang hăm lơ tơdrong akŏm đei hop akŏm tơm, tơlĕch jang, et hơtŏk tơdrong ming man dơnơm, hơvơn asong ming man, dăr hơlen lăng hơnih asong jang, pơma đam tơdrong juăt jang păng dôm tơdrong tơƀơ̆p 2 pah đơ̆ng kơdră dêh char hăm hơnih jang mŭk drăm.

Hơnih hơdah kơ Hop akŏm noh hơnăn 133 tơdrong jang krao hơvơn asong jang đơ̆ng sơnăm 2026–2030, hăm kơsô̆ jên jang đei jê̆ 552.000 tih hlj, lơ̆m lơ tơdrong jang đơ̆ng unh hơyuh rơgoh 'lơ̆ng, hơnih jang kŏng ngĭp, tơring kơdrơ̆m, tơmang pơhiơ̆ truh tơ̆ choh jang xa kiơ̆ trong jang 'nao hơgei păng jang pơgang hơmet jĭ jăn.

Lơ̆m noh, dêh char Đăk Lăk rơih pơhlom 20 tơdrong jang tơm vă akŏm tơlĕch jang, atŭm hăm noh gô vă pơjao tơchơ̆t asong jang ăn 26 tơdrong jang, hăm kơsô̆ jên pơkăp jang hloh 48.300 tih hlj kơtă ah hop akŏm.

Tơgop keh đang tơdrong kăl hơmet, ƀok Nguyễn Thiên Văn, Phŏ Kơdră Hơnih jang vei lăng kon pơlei dêh char Đăk Lăk athei dăr hơlen, hơmet dôm tơdrong jang oei kơƀah, mă kăl noh gah jang pơgang păng pơtho pơhrăm, dôm tơdrong jang tŏk bŏk oei đei lơ hơnih asong jang tơrĕk truh: “Lơ̆m pơkăp jang kơ dêh char 'măng mă ou, bơ̆n đei minh ƀar tơring teh vă pơm hnam rong đe 'lŏ kră, dôm hnam pơgang hơmet tơdrong jĭ ăl, noh athei tơlĕch asong jang. Gah tơdrong pơtho pơhrăm, athei hơmet đei teh vă jang tôm lơ̆m tơpôl, hơvơn dôm hnam trưng hŏk hơdoi kơ dôm jăl hŏk tih să”

Ƀok Đỗ Hữu Huy, Kơdră Hơnih jang vei lăng kon pơlei dêh char Đăk Lăk ră hơdah, athei hơtŏk tơdrong hơgei kơ hop akŏm, lăng ou ưh hơdrô̆ jĭ tơdrong tơlĕch jang ƀônh ƀŏ đĕch ôh, mă athei jing “hơnih tơm” hơvơn asong jang kơ sơnăm 2026.

Kiơ̆ kơ ƀok Đỗ Hữu Huy, tơring hlôi păng tŏk bŏk hơmet tôm tơdrong kăl, kơchăng rim tơdrong vă sơng iŏk tơdrong asong jang 'nao. Kiơ̆ pơkăp atŭm noh tơplih kơtang đơ̆ng hơmet jing pơm jang, đơ̆ng pơkăp jing tơlĕch jang hơdah lơ̆m hop akŏm, “hơmet tơpu sơng sem grơ̆”, pơm trong hơtŏk kơtang hăm dôm tơdrong tơlĕch jang tih: “Tơchơ̆t lơ̆m hop akŏm ou, bơ̆n pơgơ̆r athei mă tơnăp hloh, đei jơnei hloh, lăng tơpăt hăm tơdrong pơkăp pơm jang; hơdrin lơ̆m giĕng pơgơ̆r hop akŏm athei pơtơm đei lơ tơdrong tơlĕch jang hloh, tơdrong jang athei hơlen lăng mă tơgăl hăm mŭk drăm hlôi đei”.