VOV4.Bahnar - Đơ̆ng rŏng kơ apŭng Đak R’Lấp, dêh char Dak Nông bơ̆ jang kiơ̆ tơ drong hơ găt pơ vang găn tơ pôl đơ̆ng Tơ drong tơ chơ̆t 16 lơ̆m ‘năr 7/9 hăm trong jang “bu tơ̆ yơ oei tơ̆ noh” vă tang găn jĭ, Khul drŏ kăn apŭng tơ lĕch trong “shipe tơ mam ưh iŏk jên” năm kơ chơ tơ gŭm ăn kon pơ lei.

Khul jang năm kơ chơ tơ gŭm ăn kon pơ lei

Kiơ̆ kơ ‘nŏh, tơ̆ 11 xăh, thĭ trơ̆n, Khul drŏ kăn apŭng pơ jing 110 khul grŭp năm kơ chơ ưh đei hiong jên, hăm tơ drong vang akŏm đơ̆ng vă jê̆ 700 ‘nu bơ ngai jang tơ̆ dôm pơ lei, pơ la, kueng kơ phô̆. Rim năr, dôm khul grŭp “shippe tơ mam ưh đei iŏk jên” chă năm iŏk hla ar chih tơ mam vă năm kơ chơ tơ gŭm ăn unh hnam kon pơ lei.

Mưh pơ jao tơ mam ‘nŏh ưh gơ̆h năm tơ ƀâp tơ păt mă ming ƀât ‘măng dur lê̆ kon pơ lei năm iŏk, lăp hăm tơ drong tang găn jĭ. Trong jang âu gô đei Khul drŏ kăn apŭng Đak R’lấp vei kơ jăp lơ̆m khei ‘năr pơ vang găn tơ pôl kiơ̆ tơ drong Tơ chơ̆t 16.

Dơ̆ng: Tơ blơ̆