VOV4.Bahnar  – Jô̆ đơ̆ng 12 jơ năr 22/9, apŭng Đăk R’lấp, dêh char Đăk Nông pơtôch pơm kiơ̆ pơkăp oei tơklăh lơ̆m tơpôl kiơ̆ Tơchơ̆t 16. Lơ̆m jâ̆p apŭng gô pơtoi pơm kiơ̆ Tơchơ̆t 15. Mă lei hăm tơdrong oei hơbuh hli hlơt đơ̆ng pơrang jĭ, Anih vei lăng kon pơlei dêh char Đăk Nông pơkăl Anih vei lăng kon pơlei apŭng Đăk R'Lấp iŏk yua minh ƀar pơkăp tang găn păng tơjră pơrang jĭ Covid-19 kiơ̆ Tơchơ̆t 15+ hăm dôm xăh Đăk Ru păng xăh Quảng Tín (jing 2 xăh đei lơ bơngai tơpoh jĭ lơ̆m tơpôl). Hăm dôm anih jang tĕch pơdro tơmam xa kiơ̆ jih jăl trong tih, adrô̆ tĕch 'nhăk vih. Tơ̆ dôm anih pơkăp oei tơklăh minh ƀôt, dôm bơngai F1 pơtoi khei năr pơkăp oei tơklăh lơ̆m 7 năr. Tơring pơtoi tơroi truh kon pơlei nĕ kơ lĕch tơ̆ trong, pơm kiơ̆ ƀlep dôm tơdrong pơkăp tang găn păng tơjră pơrang jĭ Covid-19, khŏm ưh đei lê̆ pơrang jĭ lang xă hơlơ̆k dơ̆ng.

Jô̆ truh năr 22/9, dêh char Đăk Nông băt đei 664 'nu bơngai ƀơm jĭ SARS-CoV-2. Lơ̆m noh, apŭng Đăk R’Lấp đei 314 'nu. Jâ̆p dêh char dang ei đei 242 'nu ƀơm jĭ hlôi đei axong lĕch đơ̆ng hnam pơgang, 1 'nu lôch hơchăng.

Lan chih păng pơre nơ̆r