VOV4.Bahnar - Vă tơgŭm djru tơtom ăn kon pơlei tơring ăn oei hơtăih dih băl, pơvang tang găn, mă kăl hăm rim ŭnh hnam dơnŭh, ŭnh hnam kon kông, ŭnh hnam tơnap tap lơ̆m apŭng Dak Rlâp, dêh char Dak Nông hlôi chă hơvơn kon pơlei vang tơra tơgop đei hlŏh kơ hrĕng tân phe ƀa, tơmam drăm sa păng ‘nhot sa plei ‘long. Kiơ̆ kơ ‘nŏh, đơ̆ng năr 7/9 trŭh dang ei, apŭng Dak Rlâp hlôi chă hơvơn đei hlŏh 55 tân phe, 66 tân ‘nhot sa, plei ‘long, vă jê̆ 1.300 tơnô̆ tơmam drăm păng hlŏh 300 trĭu hlak jên tơgum djru ăn kon pơlei tang găn jĭ hơbŭh Covid-19. ‘Ngoăih tơgŭm ăn kon pơlei oei tơ̆ tơring pơvang tang găn, apŭng hlôi klăh asong bơ̆n phe, ‘nhot, ƀum, plei ‘long ăn rim hơnĭh ăn oei hơdrô̆ akŏm lơ̆m dêh char. Jing tơring mă blŭng tơ̆ Dak Nông jang kiơ̆ ăn oei hơtăih dĭh băl-pơvang tang găn vă tang găn jĭ Covid-19, ƀok Phạm Văn Hải, Kơdră chĕp pơgơ̆r Dơnŏ anĭh vei lăng kon pơlei tơring Quảng Tín, apŭng Dak Rlâp tơbăt, hăm tơdrong vang tơgŭm djru đơ̆ng rim hơnĭh bơ̆ jang, kŏng ang ƀô̆ đô̆i păng kon pơlei, rim ŭnh hnam păng rim bơngai oei lơ̆m tơring pơvang tang găn, hlôi măh phe sa ƀa sŏng, tơmam drăm sa. 2 hơnĭh mơmat tat hlŏh găh tơdrong jĭ hơbŭh Covid-19 ‘nŏh bon Bu Bir păng Bu Dzách,trŭh dang ei jĭ hơbŭh hlôi tang găn kĕ păng tơdrong erĭh sa kơ kon pơlei vĭh hơlơ̆k ‘lơ̆ng hơ iă nhen so dơ̆ng.

Tơblơ̆ nơ̆r: Amazưt