VOV4.Bahnar - Tơ̆ hơnăp tơdrong pơm sơđơ̆ng tơdrong erĭh sa ăn kon pơlei ‘nao brŏk đơ̆ng rim dêh char găh pơbăh đơ̆ng rŏng jĭ hơbŭh Covid-19, apŭng Krông Ƀŭk, dêh char Dak Lăk tŏk bŏk tơ iung pơjing trong jang trŏ ƀlep vă pơjing đei tơdrong jang păng erĭh sa sơđơ̆ng ƀơ̆t măt, adoi nhen đei rim trong jang lăng trŭh đunh đai vă tơgŭm pơjing tơdrong jang ăn kon pơlei brŏk vĭh tơ̆ pơlei pơla.

Đơ̆ng khei 5 trŭh dang ei, apŭng Krông Ƀŭk hlôi sơng đei 6.000 ‘nu kon pơlei brŏk đơ̆ng rim dêh char găh Pơbăh

Tôm khei ‘năr ăn oei hơdrô̆ lăp đơ̆ng rŏng brŏk vĭh tơ̆ pơlei hăm hao gre bơbĭt, ‘nhŏng Y Ngŏk Niê, oei tơ̆ ƀuôn Ktơng Drun, tơring Cư Nĕ, apŭng Krông Ƀŭk tŏk bŏk tơchă tơdrong jang tơ̆ tơring. Y Ngŏk Niê tơbăt, sơ̆ ‘nhŏng jang kŏng nhân lơ̆m kŏng ty tơ̆ thĭ xăh Bến Cát, dêh char Bình Dương. Kơ yuơ jĭ hơbŭh Covid-19 pơrăm kơtang, đơ̆ng rŏng lơ khei “tơhlăk” tơ̆ Bình Dương mư̆h dêh char au tơlĕch jang tang găn jĭ hơbŭh kơ hret, mă đơ̆ng hlôi ƀet 2 jrŭm vaccine mă lei kơ yuơ tơdrong jang ư̆h hơnơ̆ng, tơdrong hơmơt tơpŏh kơtang, kon jên mông răk hlôi gŏh, ‘nhŏng Y Ngŏk măh brŏk vĭh tơ̆ pơlei vă vĕh ver jĭ jăn păng tơchă tơdrong jang tơ jê̆ ŭnh hnam.“Dang yơ đei sơđơ̆ng ƀiơ̆ ‘noh ĭnh jei vă tơchă tơdrong jang lăp hăm bơ̆n. Kơ yuơ ba hưch hanh vơ̆r gre păng hlôi đei ƀăng vơ̆r gre bơih kơna dang yơ jĭ hơbŭh dă ƀiơ̆ ‘nŏh ĭnh vă tơdră tơdrong jang tơ̆ mĭnh kŏng ty dăh mă hơnĭh mơdro sa ayơ ‘nŏh vă vơ̆r gre. Ƀơ̆t măt ‘noh ba oei tơ̆ hnam chă jang mir tơgŭm ăn ŭnh hnam, jei vă trŭh pơyan phĕ chehphe bơih kơna ba chă phe chĕhphe vă đei kon jên”. 

Kơ yuơ ŭnh hnam tơnap tap, tĕh jang sa ư̆h kơ gan đei kơna đunh kơ au 2 sơnăm, ‘nhŏng Lương Văn Hữu, oei tơ̆ ƀuôn Cư Mtâo, tơring Ea Sin, apŭng Krông Ƀŭk năm tơ̆ Bình Dương jang kŏng nhân. Đơ̆ng vă đĭ khei 5, jĭ hơbŭh Covid-19 pơrăm kơtang tơ̆ rim dêh char găh Pơbăh, kŏng ty kăt tơjur bơngai jang, ‘nhŏng măh brŏk vĭh tơ̆ ŭnh hnam vă veh ver jĭ hơbŭh. Lơ̆m khei ‘năr gô chang tơchă đei tơdrong jang, ‘nhŏng Hữu apĭnh vang iung jang lơ̆m khŭl đoàn hơdrŭh tơdăm tơgŭm djru tang găn jĭ hơbŭh tơ̆ tơring.“Ĭnh brŏk tơ̆ pơlei lăng ƀô̆h đe sư bơ̆ jang tơgŭm djru tôch gleh hrat, kơdĭh ĭnh oei tơ̆ hnam ‘mi kial lơ lau jei ư̆h kơ gơ̆h jang yă kiơ mơ̆n kơna ĭnh vang jang tơgŭm djru tŏ sĕt. Ĭnh hơpơi jĭ hơbŭh hrôih yak hlŏh vă tơdrong erĭh vĭh hơlơk hiôk hian đêl so dơ̆ng”.

Tơchĕng hơlau pơyan phĕ chehphe sơnăm au, apŭng Krông Ƀŭk kăl đei 27.000 ‘nu bơngai jang lơ̆m 30 năr

Kiơ̆ đơ̆ng ƀok Hoàng Kiên Cường, Kơdră chĕp pơgơ̆r Dơnŏ anĭh vei lăng kon pơlei apŭng Krông Ƀŭk, dêh char Dak Lăk, đơ̆ng khei 5 trŭh dang ei, apŭng hlôi sơng đei dang 6.000 ‘nu kon pơlei brŏk vĭh đơ̆ng rim dêh char Bình Dương, Đồng Nai păng pơlei tơm Hồ Chí Minh, đĭ đăng jĭ dôm bơngai lơ̆m sơnăm jang sa năm chă jang sa. Lăp đơ̆ng rŏng sơng hơvơn kon pơlei brŏk vĭh, apŭng hlôi jang kiơ̆ rim trong jang khăm hơlen, ăn oei hơdrô̆ kiơ̆ tơdrong tơchơ̆t vă sơđơ̆ng bơ̆ jang tang găn jĭ hơbŭh.

        Hrei au, lơ̆m apŭng đei vă jê̆ 19.800 ha chehphe vă jê̆ trŭh khei năr phĕ, hăm phĕ ot đei dang 44.200 tân găr. Kiơ̆ kơ ‘nŏh kăl đei vă jê̆ 800.000 ‘nu bơngai phĕ, hơtŏ vă jê̆ 27.000 ‘nu bơngai jang chă phĕ lơ̆m 30 năr. Dôm sơnăm hơdrol, mĭnh sơnăm apŭng chă hơvơn hlŏh 6.600 ‘nu bơngai jang đơ̆ng rim dêh char anai vă chă phĕ chehphe. Sơnăm au, kơ yuơ tơdrong jĭ pơrăm kơtang kơna măt bơngai jang au nhen lĕ tơchă ư̆h kơ đei, tơplĭh kơ ‘nŏh, apŭng gô krao hơvơn hloi dôm bơngai jang ‘nao brŏk đơ̆ng rim dêh char vă mĭnh păh sơđơ̆ng ăn chă phĕ chehphe đang ƀlep pơyan, mĭnh păh tơchă đei tơdrong jang sa sơđơ̆ng ƀơ̆t măt ăn kon pơlei. Ƀok Hoàng Kiên Cường pơma:“Lơ̆m pơyan phĕ chehphe trŭh au kơnh rŏ năng ư̆h kơ gan đei bơngai jang păng hlôi đei hơmet hơdrol dôm bơngai jang ‘nao brŏk vĭh đơ̆ng rim dêh char găh Pơbăh kơna ‘nau jing tơdrong pơjing đei twodrong jang ƀơ̆t măt ăn đe sư. Găh đunh đai ‘nŏh lăp đơ̆ng rŏng đei sơđơ̆ng păng tang găn kĕ jĭ hơbŭh jei gô hơnơ̆ng atŏk kơtang pơtho tơdrong jang vă tơchă đei tơdrong jang ăn rim bơngai jang; krao hơvơn rim hơnĭh mơdro sa tơmơ̆t jên jang vă mư̆h rim hơnĭh mơdro sa đei tơ iung pơjing ‘nŏh mă tơgop tơchă đei tơdrong jang ăn kon pơlei lơ̆m apŭng, mă kăl rim kon pơlei ‘nao brŏk vĭh đơ̆ng rim dêh char găh pơbăh”.

Kiơ̆ chĭh jô̆ đơ̆ng Dơnŏ anĭh vei lăng Tơdrong jang-Bơngai rơka păng Tơbôl dêh char Dak Lăk, đơ̆ng khei 7/2021 trŭh dang ei, lơ̆m dêh char đei hlŏh 75.000 ‘nu kon pơlei brŏk vĭh đơ̆ng rim dêh char. Hơdrô̆ lơ̆m dôm năr blŭng khei 10 trŭh dang ei, đei vă jê̆ 26.000 ‘nu. Lơ̆m au găh lơ kŏng nhân tŏk bŏk jang tơ̆ rim Hơnĭh jang kmăi kmŏk pơm tơlĕch tơmam drăm tơ̆ Bình Dương, Đồng Nai, TPHCM. Vă tơgŭm ăn khŭl au, Hơnĭh vei lăng Tơdrong jang hlôi pơma dơnŭh hăm rim tơring ‘mĕh vă tơchă bơngai jang vă tơgoăt dĭh băl tơchă, pơtrŭh bơngai jang mư̆h rim hnam kmăi iung jang dơ̆ng lăp đơ̆ng rŏng jĭ hơbŭh. Hăm dôm bơngai jang ‘mĕh vă jang kơtă lơ̆m tơring, Hơnĭh au jei athei Hơnĭh vei lăng Tơdrong jang rim apŭng, thĭ xăh, pơlei tơm chĭh akŏm măt bơngai jang vă pơjing trong iung jang tơgŭm djru trŏ ƀlep. 

Bơngai chĭh: H’Xĭu

Tơblơ̆ nơ̆r: Amazưt