VOV4.Bahnar - Khul kơ dră pơ gơ̆r kơ apŭng plenh tĕh Tơ drong jang Kon bơ ngai păng cham char arih UNESCO ‘nao hôp trư̆k tuyê̆n tơ̆ Nigeria, pơ gơ̆r tăh kơ phĭu drơ̆ng nơ̆r ăn dôm hla ar chih Tơ ring cham char bri brăh kăp gĭt kơ apŭng plenh tĕh. Lơ̆m nŏh, Việt Nam đei 2 tơ ring cham char bri brăh kăp gĭt đei tăh kơ phĭu ‘măng mă âu ‘nŏh jĭ Tơ ring cham char bri brăh kăp gĭt Kon Hà Nừng (dêh char Gia Lai) păng Tơ ring cham char bri brăh kăp gĭt Kông Chúa (dêh char Ninh Thuận).

Truh akŏm păng iung pơ ma tơ̆ âu, Phŏ Kơ dră vei lăng kon pơ lei dêh char Gia Lai Kpă Thuyên ăn tơ băt: Đơ̆ng rŏng đei chih tơ băt, Dơ nŏ anih vei lăng kon pơ lei dêh char Gia Lai pơ kăp bơ̆ jang ‘lơ̆ng dôm tơ drong hơ găt đơ̆ng UNESCO vă pơm ‘lơ̆ng ăn dôm tơ drong tơ chơ̆t păng tơ drong đei yoa đơ̆ng 1 tơ ring cham char bri brăh kăp gĭt, pơm ăn Tơ ring cham char bri brăh kăp gĭt Kon Hà Nừng jing trong jang atŏk tơ iung mŭk drăm, tơ pôl kơ jăp ‘lơ̆ng tơ̆ tơ ring, vei lăng ‘lơ̆ng cham char tơ mam bri brăh hăm tơ drong jŏh ayŏ kơ dŏ xoang xo dôm hơ drĕch hơ drung; tơ drong jang atŏk tơ iung mŭk drăm hăm vei lăng cham char, iŏk yoa ‘lơ̆ng tơ mam drăm, pơm hơ tŏk tơ drong arih xa, pơ tho pơ hrăm păng tơ chĕng hơ len khoa hŏk.

Dơ̆ng: Tơ blơ̆