VOV4.Bahnar - Ƀlep ƀơ̆t Tết Trung Thu, pơ gê ‘năr 20/9, Trung ương Đoàn hơ druh tơ dăm cộng sản Hồ Chí Minh, Trung ương Khŭl vei lăng hơ druh tơ dămn Việt Nam păng Trung ương Khŭl thây pơ gang mơ lôh Việt Nam pơ jao asong ăn Anih jang đoàn pơ lei tơm Hà Nội păng khŭl thây pơ gang mơ lôh Hà Nội 1 rơ bâu 500 ƀĕng trung Thu vă gơ̆ih truh ăn đe y ƀak si tŏk bŏk bơ̆ jang tang găn jĭ păng 100 “ Tơ pu pơ gang F0”, pơ yua ăn tơ drong jang hơ met bơ ngai jĭ tơ̆ Hà Nội. Đơ̆ng ‘năr 12/9 truh 20/9, rim kang ƀô̆ kơ Trung ương Đoàn hơ druh tơ dăm cộng sản Hồ Chí Minh, Trung ương Khŭl vei lăng hơ druh tơ dăm Việt Nam păng khŭl năm jang tơ gŭm kŭm hlôi pơm 12 rơ bâu tŏ ƀĕng trung thu vă pơ jao asong truh đe y ƀak si bơ̆ jang tang găn jĭ tơ̆ rim tơ ring. Kăl kơ lăng truh, lơ̆m giĕng âu ki, tơ̆ pơ lei tơm Hồ Chí Minh, Trung ương khŭl thây pơ gang mơ lôh Việt Nam hơ nơ̆ng chă asong 3.000 “Tơ pu pơ gang F0” păng ƀĕng trung thu ăn bơ ngai jĭ Covid-19 hơ met tơ̆ hnam, đei kơ jă vă jê̆ 800 rơ bâu hlak jên 1 tơ pu. Trung ương khŭl thây pơ gang mơ lôh Việt Nam kŭm hơ nơ̆ng tơ gŭm 50 ‘nu y, ƀak si tơ jră jĭ ‘lơ̆ng, đei tơ drong arih sa mơ mat tat, 1 ‘nu 10 triệu hlak jên, lơ̆m noh Hà Nội đei 10 y, ƀak si.

Thuem: Tơ blơ̆