VOV4.Bahnar – Tơ̆ apŭng Ea H’leo, dêh char Đăk Lăk, anih pơtho pơhrăm hlôi tơlĕch hơbĕch hơbal dôm trong pơtho hŏk kơtă păng trư̆k tuyê̆n vei xơđơ̆ng ăn tơdrong hŏk hăm hŏk tro lơ̆m khei năr hơbuh hli đơ̆ng pơrang jĭ Covid-19.

        Hloh minh giĕng kơ âu, kơtă ăh pơrang jĭ Covid-19 đei pơgăn, Hnam trưng Jăl kơđeh Ea H’leo, apŭng Ea H’leo hlôi tenh kuăng pơgơ̆r ăn hŏk tro hŏk tơ̆ lăm. Ƀok thây Nguyễn Văn Tân, Kơdră hnam trưng ăn tơbăt, dang ei hnam trưng đei 16 lămhŏk hăm 523 hŏk tro, lơ̆m noh hŏk tro kon kông đei 216 oh: “Vă vei xơđơ̆ng ăn tơdrong pơtho hŏk ăn kơ đe mon, hơmet pruih pơgang brai pơnhŭl, axong măh đak pơgang ôp ti. Hnam trưng axong jing lăm hŏk iơ iĕ vă vei xơđơ̆ng kơsô̆ pơkăp tơ̆ hơla 30 hŏk tro minh lăm. Hnam trưng tơgŭm ăn anih jang kơpal ƀet mă tôm pơgang bơ̆ng jĭ ăn kang ƀô̆, bơngai jang. Găh kơsô̆ hŏk tro tam mă gơh truh hnam trưng kơyuơ đe oh athei pơm kiơ̆ pơkăp oei tơklăh noh hnam trưng hlôi axong hla bar hŏk ăn đe mon hăm trong pơjao ăn ƀai hŏk”.

Oh Nguyễn Phạm Bảo An, hŏk tro lăm 5A, hnam trưng Jăl kơđeh Ea H’leo chơt hơ iă đei chôt vih tơ̆ hnam trưng đơ̆ng rŏng kơ đunh khei năr oei tơklăh kơyuơ pơrang jĭ: “Ăh inh năm hŏk noh inh xô̆ xôn kơlih đei tơƀơ̆p bôl boăl păng đe thây kô. Ăh inh hŏk tơ̆ hnam noh dôm ƀai hŏk tơnap inh ưh kơ băt vă apinh kô mă adrô̆ chih tơbăt lơ̆m zalo vă apinh. Oei hŏk kơtă tơ̆ hnam trưng noh kô pơtho tơblang hơdăh hloi”.

Hơbĕch lơ̆m tơdrong pơtho păng hŏk trư̆k tuyê̆n, pơjao ƀai... kiơ̆ kơ tơdrong hơbuh đơ̆ng pơrang jĭ covid-19 hlôi đei dôm hnam trưng hŏk tơ̆ apŭng Ea H’leo, dêh char Đăk Lăk iŏk jang tôch tơnăp. Kô pơtho Nguyễn Thị Minh Trường, Phŏ Kơdră Hnam trưng jăl kơđeh Ea Khăl ăn tơbăt: vă tơdrong pơtho hŏk trư̆k tuyê̆n gơh đei jơnei, hnam trưng hlôi axong jene chô̆ đương truyên, pơkăp tơdrong hŏk trŏ ƀlep; bơngai pơtho chih akŏm ƀai hŏk kiơ̆ trong ‘nao, chih akŏm dôm tơdrong kăl, kơđeh hloh vă đe hŏk tro ƀônh băt vao. Jê̆ 500 hŏk tro, lơ̆m noh đei 210 ‘nu oh kon kông tơ̆ Hnam trưng jăl kơđeh Ea Khăl, xăh Ea Khăl, apŭng Ea H’Leo hlôi juăt hăm tơdrong hŏk trư̆k tuyê̆n: “Hnam trưng duh pơgơ̆r ăn đe oh hŏk trư̆k tuyê̆n, đe oh oei tơjê̆ hnam dih băl mă hŏk atŭm lăm dăh mă hơtŏ lăm noh chă hŏk atŭm ƀar pêng ‘nu minh kơmăi. Đe oh mă yơ ưh đei kơmăi hŏk trư̆k tuyê̆n noh hnam trưng chih akŏm pơjao ƀai. Đei hŏk tro kơyuơ đei ‘nhŏng oh chôt vih đơ̆ng tơring hơbuh pơrang jĭ noh ưh gơh truh hnam trưng, ưh gơh năm hŏk tơ̆ hnam boăl, noh đe thây kô ưh đei truh kơtă tơ̆ hnam, athei gơnơm kơ đe pơgơ̆r tơring, truh tơ̆ khul covid tơ̆ pơlei pơla tơgŭm”.

Apŭng Ea H’leo dang ei đei 67 hnam trưng hŏk hăm hloh 29.000 hŏk tro đơ̆ng jăl mầm non truh trung hŏk kơ sở. Ƀok Phạm Văn Đảng, Kơdră tơdăng kơ Anih Pơtho Pơhrăm apŭng Ea H’leo ăn tơbăt: Kơyuơ pơrang jĭ duh tam mă đei tang găn, lơ̆ma pŭng ‘nao đei tong anê̆ kơsô̆ hnam trưng tơplih pơtho kơtă. Tơdrong vei xơđơ̆ng tang găn păng tơjră pơrang jĭ hơnơ̆ng đei rim hnam trưng kơhret kơjăp. Rim hnam trưng hơnơ̆ng chă hơlen, chih akŏm dôm hŏk tro đei ‘nhŏng oh chôt vih đơ̆ng tơring hơbuh pơrang mă tŏk bŏk pơkăp oei tơklăh tơ̆ hnam vă đei trong hŏk pơhrăm trŏ ƀlep hloh: “Găh Anih Pơtho Pơhrăm hlôi đei hla bar pơtho dôm hnam trưng chih akŏm trong pơkăp pơtho hŏk. Păng rim bơngai pơtho athei chih akŏm pơtho hŏk ăn kơ lăm po, lơ̆m noh tơrĕk truh tơdrong tơnăp pơtho ăn đe hŏk tro. Mă hăm trong mă yơ noh tơdrong hŏk dơnơm đe hŏk tro athei băt hơdăh, ăh kiêm tra hŏk tro dang yơ kiêm tra dang noh hloi. Pơgenh jơ ‘năr rơvơn ăh đe hŏk tro truh hnam trưng vă hơtho hơtŏk ăn đe oh hŏk trư̆k tuyê̆n gơh xơđơ̆ng vao. Ƀơ̆t mă đei băt găh F0 păng tơ̆ tơring noh ưh đei xơđơ̆ng noh đe mon athei hŏk trư̆k tuyê̆n, pơjao ƀai hŏk. Oei ăh tơring xơđơ̆ng noh pơtho hŏk kơtă kiơ̆ tơdrong pơgơ̆r đơ̆ng Jơnŭm pơgơ̆r xăh, kơdră hnam trưng tơroi ăn đe mon truh hnam trưng”.

Truh dang ei, tơ̆ apŭng Ea H’leo bơngai pơtho păng hŏk tro pă đei chrih kiơ hăm tơdrong tơplih hơbĕch hơbal trong pơkăp hŏk pơhrăm. Tơdrong hơmet ăn pơtho hŏk trư̆k tuyê̆n duh nhen hŏk kơtă kơ dôm hnam trưng hlôi đei pơgơ̆r xơđơ̆ng ‘lơ̆ng tơgŭm ăn hŏk tro kiơ̆ tom tơdrong pơkăp hŏk pơhrăm.

Lan chih păng pơre nơ̆r