VOV4.Bahnar - Kơ sơ̆ ‘năr 28/9, Phŏ Thủ tướng Vũ Đức Đam, Grŭp bơ̆ jang gĭt kăl kơ Khŭl kơ dră teh đak bơ̆ jang tang găn jĭ COVID-19 hop akŏm trực tuyến hăm 19 dêh char găh pơ băh, 1,2 dêh char Tây Nguyên, pơ băh tŏk bŏk găh tơ drong hơ nơ̆ng jang hơ dai kơ jăp vă vei lăng jĭ hơ buh. Tơ̆ ‘măng hop akŏm, bơ ngai tang măt pơ lei tơm Hồ Chí Minh păng dôm dêh char Bình Dương, Đồng Nai, Long An ‘meh vă sơng kon pơ lei tơ̆ dôm dêh char pha ra băl bơ̆ jang hơ lơ̆k dơ̆ng; hơ dai hăm athei bơ ngai jang tŏk bŏk oei tơ̆ tơ ring hơ nơ̆ng oei dơ̆ng tơ̆ noh. Rim tơ ring âu pơ kăp vei sơ đơ̆ng tơ drong arih sa tơ pôl, ƀet vaccine ăn kon pơ lei păng jăh tơ iung ming pơm tơ lĕch, pơm tơ drong jang sa.

Phŏ Thủ tướng Vũ Đức Đam kŭm hăm grŭp bơ̆ jang hôp akŏm hăm 19 dêh char, pơ lei găh pơ băh

Kơ dră chĕp kơ̆l rim dêh char uơ oei dơ̆ng pơ ma hơ dăh ling lang jang hơ dai kơ jăp hăm pơ lei tơm Hồ Chí minh, Bình Dương, Đồng Nai, Long An lơ̆m tang găn jĭ. Kiơ̆ tang măt Anih tơm vei lăng găh jang pơ gang, mă đơ̆ng pơ lei tơm Hồ Chí Minh, Bình Dương, Đồng Nai, Long An đei kơ sô̆ bơ ngai ƀet vaccine jrŭm 1 tôch kơ lơ mă lei bơ ngai hlôi đei ƀet oei  jĭ, tơ poh ăn bơ ngai nai. Yua thoi noh, tơ drong năm vih vơ̆t đơ̆ng kon pơ lei tơ̆ pơ lei tơm Hồ Chí Minh, Long An, Bình Dương, Đồng Nai brŏk tơ̆ rim tơ ring nai oei athei vei lăng, ăn oei hơ drô̆ kơ tang kiơ̆ tơ drong hơ găt.

Thuem: Tơ blơ̆