VOV4.Bahnar - Vă tơ gŭm ăn kon pơ lei đei tơ drong arih xa mơ mat tat yoa đơ̆ng jĭ Covid-19, Khul bơ ngai tĕch mơ dro oei mơ lôh dêh char Dak Nông pơm “ATM phe asong đĕch” ƀơk truh dôm jĭt tân phe ăn kon pơ lei. Dôm ATM âu oei đei pơm dơ̆ng tơ̆ lơ tơ ring ƀơm ưh ‘lơ̆ng đơ̆ng jĭ Covid-19 tơ̆ dêh char.

‘Nao tŏng iŏk 3 ki phe đơ̆ng “ATM phe asong đĕch”, yă Trần Thị An, tơ̆ phương Nghĩa Tân, plt Gia Nghĩa, dêh char Dak Nông ăn tơ băt plei yă tơ̆ Cần Thơ. Tơ drong arih xa kơ yă oei tôch mơ mat tat, oei tơ̆ plei Cần thơ kŭm đei jĭ tơ pŏh ‘năi, kơ na ưh đei bu tơ gŭm. Năr ‘nâu kơ tơ̆ng đe ƀơk phe ‘nŏh yă truh iŏk: “Inh đơ̆ng pơ lei tŏk tơ̆ âu mơng hnam đe đang kơ ‘nŏh chă dônh bơ̆n kơ chai, nhôm nhuơ̆, dôm năr ‘nâu jĭ tơ pŏh kơ na ưh gơ̆h năm tơ̆ yơ. Đe ma chă ƀơk ăn phe kŭm đei đăi por sŏng 2,3 năr, inh bơ nê lơ dêh”.

ATM phe asong đĕch yoa Khul bơ ngai tĕch mơ dro oei mơ lôh kơ dêh char Dak Nông pơm vă tơ gŭm ăn bơ ngai mơ mat tat

Nhen thoi nŏh mơ̆n, mŏ H’Nhung tơ̆ Bon Đắk Nur, phương Nghĩa Đức, plt Gia Nghĩa ăn tơ băt, unh hnam mŏ đei 8 ‘nu. Yoa ƀơm kơ nê̆ đơ̆ng jĭ kơ na rim bơ ngai ưh đei bu gơ̆h năm jang. Hơ dai hăm ‘nŏh dôm kơ loăi ‘long nhen ƀơ, sâu riêng tĕch ưh gơ̆h pơm ăn tơ drong arih xa tơ ƀâp lơ mơ mat tat. Yoa thoi nŏh, mă đơ̆ng lăp 3kg phe đơ̆ng “ATM phe asong đĕch” kŭm pơm ăn mŏ tôch hiôk jơ hngâm: “Unh hnam nhôn jang chŭn mir ngăl kơ na tơ mam đơ̆ng choh jang đei, lơ tơ mam hiong kơ jă pơm ăn tơ drong arih xa rim năr tơ ƀâp lơ mơ mat tat. Gơ nơm đei Đảng, tĕh đak, dôm khul grŭp tơ gŭm, pơm “ATM phe asong đĕch” ‘nŏh gơ̆h đei por sŏng rim năr, pơm tơ jur ƀiơ̆ mơ mat tat, nŏng chă pơ pơ̆ jên vă răt phe, kon pơ lei tôch hơ iă”.

Rim bơ ngai pơm kiơ̆ ‘lơ̆ng dôm trong jang tang găn jĭ Covid-19 mưh năm iŏk phe

Hăm trong jang bu đei năm asong, bu mơ mat tat ‘nŏh truh iŏk “ATM phe asong đĕch” yoa Khul bơ ngai tĕch mơ dro oei mơ lôh Dak Nông pơm, ‘nao lăp 4 năr đĕch đĭ ƀơk đei hlŏh 6 tân phe ăn hlŏh 2.000 ‘nu bơ ngai đei tơ drong arih xa mơ mat tat tơ̆ plt Gia Nghĩa. Kiơ̆ ‘nhŏng Nguyễn Ngọc Chính, Kơ dră vei lăng Khul bơ ngai tĕch mơ deo oei mơ lôh dêh char Dak Nông ‘ngoăih kơ ƀơk phe tơ̆ plt Gia Nghĩa, ATM phe asong đĕch vă pơ gơ̆r pơm ƀơk đĕch phe ăn kon pơ lei tơ ƀâp mơ mat tat tơ̆ dôm apŭng Đắk R’lấp, Tuy Đức păng Đắk G’long hai. ‘Nhŏng ăn tơ băt: “Khul hlôi krao hơ vơn tơ gop đei 30 tân phe đei kơ jă 450 triu hlak jên vă ƀơk ăn 4 anih chă tơ gŭm ăn kon pơ lei mơ mat tat, vei lăng ‘lơ̆ng tơ drong arih xa lơ̆m pơ yan đei jĭ. ‘Ngoăih kơ 30 tân âu nhôn oei vă mong akŏm dơ̆ng 30 tân phe, akŏm đĭ đăng đei 60 tân vă chă ƀơk ăn kon pơ lei”.

Tuấn Anh: Chih

Dơ̆ng: Tơ blơ̆