VOV4.Bahnar -  Pơgê au, năr 10/6 tơ̆ Hà Nôị, Dơnŏ anĭh tơm vei lăng Chŏh jang sa păng Atŏk tơ iung tơring tơrang pơgơ̆r hop akŏm trư̆k tuyên trong jang atŏk kơtang dăng rôp, pơm tơlĕch, tĕch mơdro ka hơdang sơnăm 2021. Mă đơ̆ng đei ƀơm kơnê̆ đơ̆ng jĭ hơbŭh Covid-19, sơnăm 2020 tơdrong jang chă dăng rôp ka hơdang đei tŏk kơtang, tơdrong tŏk kơ jă pơm tơlech ka hơdang păng akŏp dăng rôp đei ka hơdang sơnăm 2020 lơ hlŏh pơtêng hăm sơnăm 2019, hăm 3 trĭu 850.000 tân, tĕch mơdro tơ̆ tĕh đak đe iŏk đei 8 ti 600 trĭu dolar, lơ̆m au ka hơdang dăng rôp tĕch mơdro iŏk đei 3 ti 200 trĭu dolar. Kiơ̆ hơlen atŭm, jĭ hơbŭh Covid-19 oei hơnơ̆ng kơtang, tơdrong tĕch mơdro ka hơdang ư̆h hơnơ̆ng tơ̆ lơ tĕh đak; kơ jă ka hơdang tơ jur; Nơ̆r tơbăt “Ư̆h gan ‘lơ̆ng” đơ̆ng Dơnŏ anĭh bơ̆ jang châu Âu oei tim mă xut xa hŭt hơnơ̆ng pơm kơnê̆ trŭh tơdrong tĕch mơdro ka hơdang tơ̆ tĕh đak đe ‘nŏh jing dôm tơdrong mơmat tat mă hơnĭh jang ka hơdang tŏk bŏk tơ jră mŭh măt.

Tơblơ̆ nơ̆r: Amazưt