VOV4.Bahnar - Kơsơ̆ năr 8/12 tơ̆ Hà Nội, Trung ương Jơnŭm vei lăng kon pơlei chŏh jang sa Việt Nam iung jang hơdoi hăm Dơnŏ anĭh tơm vei lăng Chŏh jang sa păng Atŏk tơ iung tơring tơrang pơgơ̆r Hop akŏm trư̆k tuyên kĭ pơkăp “Tơdrong jang hơdoi atŏk kơtang pơrô̆ tơbăt, tơ iung pơjing tơring tơrang ‘nao tơklep hăm hơmet pơ ‘lơ̆ng dơ̆ng hơnĭh chŏh jang sa jăl jang 2021-2025”. Iung pơma tơ̆ jơ pơm lê̆h kĭ pơlăp, ƀok Lương Quốc Đoàn, Kơdră chĕp pơgơ̆r Trung ương Jơnŭm kon pơlei chŏh jang sa Việt Nam pơma hơdăh, lơ̆m tơdrong tơgoăt tơgoăl ƀar păh chŏh jang sa-kon pơlei chŏh jang sa-tơring chŏh jang sa ‘nŏh kon pơlei jing tơm hlŏh, jing hơnĭh kơdrơ̆m, tơring chŏh jang sa ‘nŏh hơyak kăl, chŏh jang sa jing jơhngơ̆m pran. Kơdră chĕp pơgơ̆r Dơnŏ anĭh tơm vei lăng Chŏh jang sa păng Atŏk tơ iung tơring tơrang Lê Minh Hoan ‘mĕh vă, kăl hlŏh hơdăh jơhngơ̆m đon kơ kon pơlei - jing bơngai tơngla păng hơnĭh tơm kơ rim tơdrong jang tơ iung pơjing mŭk drăm-tơpôl; pơm lơ liơ vă kon pơlei chŏh jang sa kĕ pran kơtang vă yak hlŏh tơnap tap hơdrin pơm pơdrŏng lơ̆m khei ‘năr chŏh jang sa tơplĭh đơ̆ng jang sa joăt joe jing chŏh jang sa gơh hơgei, tơdrong mă au kăl đei pơ đĭ kang ƀô̆ choh jang sa păng rim kon pơlei chŏh jang sa tơ̆ tơring vang iungh jang hơdoi.

Tơblơ̆ nơ̆r: Amazưt