VOV4.Bahnar - Lơ̆m dôm tơdrong kăl tŏk bok đei Hop akŏm Trung ương ‘măng mă 4 Khul kơdră chĕp pơgơ̆r Trung ương Đảng (Jăl 13) pơma dơnŭh ‘nŏh: pơjing đei hrơ̆p mĭnh ƀŏr đon kơtang găh rim trong tơlĕch jang, tơdrong jang vă atŏk kơtang tơ iung pơjing, hơmet ming Đảng; tang găn, pơrăm hŭt jơhngơ̆m đon ư̆h kơ ‘lơ̆ng, erĭh sa ư̆h kơ ‘lơ̆ng, dôm tơdrong đei ƀô̆h “kơdĭh tơchă tơdrong” lơ̆m khŭl jang.

Tổng Bí thư Nguyễn Phú Trọng iung pơma tơ̆ Hop akŏm

Tơroi tơbăt tơ̆ hop akŏm đei ƀô̆h: 5 sơnăm au ki, đei hlŏh 87.000 ‘nu bơngai jang đảng đei tơbrar, lơ̆m au 46.000 ‘nu bơngai jang đảng đei tơbrar kơ yuơ đei ƀơm trŭh jơhngơ̆m đon tơchĕng chĭng trĭ ư̆h kơ ƀlep, jơhngơ̆m đon, erĭh sa ư̆h kơ ‘lơ̆ng. Tơdrong mă au đei ƀô̆h bơ̆ jang tang găn dôm tơdrong tang găn sa pơgơ̆m pơjĭp hlôi đei tơlĕch jang kơtang, mă lei oei tim mă ƀlep hăm tơdrong ‘mĕh vă lơ̆m tơ iung pơjing, ming hơmet Đảng rơgŏh, pran kơtang. Kiơ̆ đơ̆ng Tổng Bí thư Nguyễn Phú Trọng: “tơdrong kơnê̆” hli hlơt hlŏh ‘nŏh jĭ tơplĭh jơhngơ̆m đon chĭnh trĭ, tơdrong erĭh sa ưh kơ ‘lơ̆ng hơ iă pơm ăn trŭh sa pơgơ̆m pơjĭp. Găh sa pơgơ̆m pơjĭp păng tơplĭh jơhngơ̆m đon ư̆h kơ ‘lơ̆ng găh chĭnh trĭ, tơdrong erĭh sa “kơdĭh tơchĕng ư̆h kơ lăp” jei jing dôm tơdrong tơ ƀô̆h hơdăh pơm kơnê̆.

Tơblơ̆ nơ̆r: Amazưt