VOV4.Bahnar - Năr 18/6, Dơnŏ anĭh tơm vei lăng Hnam trương pơtho pơhrăm pơgơ̆r Hop akŏm trư̆k tuyên lơ̆m tĕh đak pơtôch 8 sơnăm jang kiơ̆ Tơdrong vă jang “Tơ iung pơjing Tơpôl hŏk pơhrăm jăl sơnăm 2012-2020”. Tơ̆ Hop akŏm, tang măt ăn rim hơnĭh tơm, hơnih bơ̆ jang đei ƀơm trŭh păng rim tơring hlôi tơbăt lơ trong jang hơ iă, dôm tơdrong tim mă ‘lơ̆ng lơ̆m tơlĕch jang kiơ̆ tơdrong vă jang au, adoi tơlĕch trong jang vă jang kiơ̆ tơdrong jang au lơ̆m jăl sơnăm 2021-2030 đei jơnei păng tơpă yan au. Tơdrong vă jang “Pơjing tơpôl hŏk pơhrăm jăl jang 2012-2020” tơlĕch ăn 4 trong jang tơm, đơ̆ng rŏng 8 sơnăm jang kiơ̆, đei 2 trong jang hlôi jang keh đang ‘nŏh: xut hŭt ư̆h kơbăt chư păng pơtho pơhrăm ming; păng trong jang Hŏk pơhrăm vă đei tơdrong erĭh sa ‘lơ̆ng hơ iă, tơ iung pơjing erĭh sa ‘lơ̆ng rim bơngai păng tơpôl roi năr roi hơnŭk hơnoa hlŏh dơ̆ng. Đơ̆ng rŏng 8 sơnăm tơlĕch jang, tơdrong vă jang hlôi pơjing đei trong tơplĭh lơ̆m hlô̆h vao kơ rim tơring, đơ̆ng nŏh hơmet pơ ‘lơ̆ng tơdrong trong pơtho pơhrăm đơ̆ng tơring vă jang kiơ̆ hŏk pơhrăm đĭ jơhnơr ăn rim bơngai. Kơdră chĕp pơgơ̆r Dơnŏ anĭh tơm vei lăng Hnam trương pơtho pơhrăm Nguyễn Kim Sơn jei tơbăt, lơ̆m khei năr kơnh, Dơnŏ anĭh tơm gô dăr lăng, lăng hơlen vă lăng hơdăh tơdrong jơnei trong bơ̆ jang kơ rim hnam trương pơtho pơhrăm thương xuyên, hơnĭh pơtho pơhrăm tơpôl, hơmet pơ ‘lơ̆ng tơdrong vang atŏk tơ iung tơpôl hŏk pơhrăm.

Tơblơ̆ nơ̆r: Amazưt