VOV4.Bahnar  – Kơsơ̆ năr 6/10/2021 tơ̆ Anih Hơlen Pơrang jĭ Trung ương, yă Robyn Modie, Kơdră jang tang măt ăn teh đak Australia tơ̆ Việt Nam hlôi pơjao ăn Thư̆ trưởng Anih tơm Y tê̆ Trương Quốc Cường 300.000 kơliu vaccine AstraZeneca pơm tơlĕch tơ̆ Úc atŭm hăm lơ tơmam drăm y tê̆. Truh dang ei Australia hlôi pơjao ăn Việt Nam hloh 700.000 kơliu vaccine (lơ̆m kơsô̆ 1,5 trĭu kơliu vaccin găh Australia hlôi pơkăp). Australia duh tơchơ̆t gô tơgŭm Việt Nam 3,7 trĭu kơliu vaccine dơ̆ng lơ̆m khei năr truh kiơ̆ tơdrong tơchơ̆t hăm UNICEF păng Anih tơm Y tê̆ Việt Nam, hơtŏk kơsô̆ vaccine mă Australia pơkăp tơgŭm ăn Việt Nam truh 5,2 trĭu kơliu, đei kơjă hơtŏ hăm 60 trĭu AUD. Găh Australia duh tŏk bŏk oei jang hadoi hăm UNICEF vă hơtŏk tơmam ‘măn vaccine, pơtho bơngai jang y tê̆ păng tơlĕch ƀet vaccine truh dôm tơring ataih yaih kơ Việt Nam. Atŭm ‘năr, Thủ tướng teh đak Phạm Minh Chính hlôi pơtruh kơthơ hmach bơnê kơ Thủ tướng Australia Scott Morrison găh tơdrong tơgŭm kăp gĭt âu.

Lan chih păng pơre nơ̆r