VOV4.Bahnar - Mă đơ̆ng tơ ƀơ̆p mơ mat tat yua đơ̆ng ƀơm kơ nê̆ đơ̆ng jĭ hơ buh covid 19 tơ̆ lơ tơ ring, ‘măng pôk rơ̆ih bơ ngai tang măt Kuôk hô̆i jăl 15 păng bơ ngai tang măt Jơ nŭm pơ gơ̆r kon pơ lei rim tơ ring jăl jang 2021-2026 hlôi jơ nei ‘lơ̆ng hơ iă hăm kơ sô̆ bơ ngai tăh hla năm pôk đei hloh 99%, hơ nhăk ăn tơ drong ‘lơ̆ng hơ iă lơ̆m jơ hngơ̆m đon bơ ngai tăh hla lơ̆m teh đak găh 1 ‘măng pôk rơ̆ih tơ păt, tơ năp păng hơ gei. Lei hơ yơ jĭ dôm hŏk iŏk đei đơ̆ng ‘măng pôk rơ̆ih âu?

Lăng dơ̆ng ‘măng pôk rơ̆ih Kuôk hô̆i păng Jơ nŭm pơ gơ̆r kon pơ lei ‘nao pơ gơ̆r, Kơ dră Kuôk hô̆i Vương Đình Huệ, Kơ dră Jơ nŭm vei lăng pôk rơ̆ih teh đak pơ ma hơ dăh, ‘măng pôk rơ̆ih ‘măng âu pơ gơ̆r ƀlep luơ̆t, ‘mơ ‘met, sơ đơ̆ng păng tơ pă jing “ Năr chơt hơ iă kơ teh đak”.

  “Tơ ring đei kơ sô̆ năm pôk rơ̆ih păng tŏ sĕt hloh kơ pal kơ 98%. Kơ sô̆ năm pôk thoi noh tôch kơ ‘lơ̆ng hơ iă bơ̆ih, ƀlă kơ ‘noh dơ̆ng bơ̆n pôk tôm 500 ‘nu bơ ngai tang măt Kuôk hô̆i. Đei dôm tơ ring nhen Bắc Giang ‘noh athei pơ gơ̆r dơ̆ng hloh 4.300 kơ thŭng kơ phiê̆u iĕ, vă pơ yua ăn kon pơ lei đei ăn oei hơ drô̆ tơ̆ hnam, ăn oei hơ drô̆ akŏm.”

Lơ̆m tơ drong jĭ hơ buh đei ƀôh krê hơ mơt, mă lei hloh 99% ‘nu bơ ngai tăh hla năm pôk, tơ drong ‘noh roi tơ ƀôh hơ dăh ăn jơ hngơ̆m đon tơ goăt tơ goăl đơ̆ng hơ drĕch hơ drŭng, roi mơ mat tat, long nol ‘noh roi ƀôh jơ hngơ̆m pran đơ̆ng kon pơ lei. Yua thoi noh, ƀai hŏk mă blŭng đơ̆ng ‘măng pôk rơ̆ih bơ ngai tang măt Kuôk hô̆i jăl 15 păng bơ ngai tang măt Jơ nŭm pơ gơ̆r kon pơ lei rim tơ ring jăl jang 2021-2026 ‘noh jĭ tơ drong lui ngeh, jơ hngơ̆m lăp păng đon băt jang tơ năp đơ̆ng kon pơ lei:

Mă đơ̆ng lơ̆m tơ drong đei ƀôh jĭ Covid-19 tôch krê hơ mơt, mă lei tơ drong ‘nao đơ̆ng ‘măng pôk rơ̆ih ‘noh jĭ dôm bơ ngai lĕch pơ jei pơm bơ ngai tang măt kuôk hô̆i păng bơ ngai tang măt Jơ nŭm pơ gơ̆r kon pơ lei hlôi tơ plih trong jang krao hơ vơn pôk rơ̆ih. Tơ plih yua kơ krao hơ vơn kơ tă, dôm bơ ngai lĕch pơ jei hlôi tơ plih jing tơ ƀơ̆p kơ tă hai, trực tuyến hai, hơ dai hăm ‘noh tơ jur kơ sô̆ rim ‘măng tơ ƀơ̆p pơ têng hăm pơ tho blŭng a. Rim tơ ring hlôi tŭn pran tơ mơ̆t yua kơ măy kơ mŏk, hơ tŏk tôch ai tơ drong đei yua đơ̆ng rim kơ măy kơ mŏk tơ roi tơ băt, aloa pơ re nơ̆r đơ̆ng rim tơ ring pơ lei pơ la. Lơ̆m hơ nih đei jĭ hơ buh, 2 dêh char Bắc Giang păng Bắc Ninh pŭ ƀơm kơ nê̆ kơ tang hloh mă lei hlôi đei lơ trong jang hơ iă, tơ gop tôch gĭt kăl pơm đei jơ nei đơ̆ng ‘măng pôk rơ̆ih. Bắc Giang đei trŭh hloh 4 rơ bâu kơ thŭng kơ phiê̆u iĕ, jĭ kơ sô̆ kơ thŭng kơ phiê̆u iĕ tih hloh lơ̆m teh đak, rim grŭp pôk rơ̆ih hlôi năm tơ̆ rim trong, tơ tĕh rim hnam” vă kơ dôm bơ ngai tăh hla ư̆h kơ gơ̆h năm tơ̆ hơ nih pôk rơ̆ih mă lei oei gơ̆h chă tăh kơ dih kơ phiê̆u pôk rơ̆ih. Kơ dră Anih vei lăng kon pơ lei dêh char Bắc Giang, Lê Ánh Dương pơ ma hơ dăh; Ƀai hŏk gĭt kăl đơ̆ng tơ drong chep kơ̆l đơ̆ng Đảng, teh đak, Kuôk hô̆i ‘noh jĭ tơ drong tơm gĭt kăl hloh vei sơ đơ̆ng jơ nei đơ̆ng ‘măng pôk rơ̆ih ƀĕnh mơ mat tat long nol nhen ‘măng pôk rơ̆ih âu ki:

 “Tơ drong pơ gơ̆r pôk rơ̆ih nhôn jô̆ truh dôm trong jang ăn tơ ring đei ăn oei hơ drô̆, tơ ring tŏk bŏk ngôi hơ tăih băl năm tơ pôl, tơ ring pơ vang găn păng ăn dôm bơ ngai tăh hla oei lơ̆m tơ ring ăn oei hơ drô̆ kŭm nhen dôm tơ ring ngôi hơ tăih băl. ‘Ngoăih kơ thŭng kơ phiê̆u tơm tơ̆ hơ nih tăh kơ phiê̆u ‘noh bơ ngai jang lơ̆m grŭp pôk rơ̆ih chĕp kơ thŭng kơ phiê̆u trŭh tơ̆ dôm hơ nih bơ ngai tăh hla ư̆h kơ gơ̆h lĕch đơ̆ng hơ nih ăn oei hơ drô̆ ‘noh oei gơ̆h pơm kiơ̆ đei tơ drong gơ̆h pôk rơ̆ih đơ̆ng kơ dih.’

Tơ drong rơ đăh găh kơ tơ̆ng ang đơ̆ng pơ ma dơ nuh rơ̆ih iŏk, rơ̆ih bơ ngai lĕch pơ jei, iŏk nơ̆r tơ gop đơ̆ng bơ ngai tăh hla găh bơ ngai lĕch pơ jei vă rơ̆ih iŏk đei dôm bơ ngai tơ găl kŭm jing ƀai hŏk gĭt kăl lơ̆m ‘măng pôk rơ̆ih âu. Kiơ̆ kơ ƀok Ngô Sách Thực, Phŏ Kơ dră Anih jang Trung ương Mặt trận tổ quốc Việt Nam ‘noh: kơ lih đơ̆ng dôm tơ drong ƀơm truh bơ ngai lĕch pơ jei đei tơ roi rơ đăh hlôi tơ gŭm kon pơ lei pôk tôm 500 ‘nu bơ ngai tang măt kuôk hô̆i:

 “Dôm bơ ngai lĕch pơ jei đei rơ̆ih iŏk lăng kiơ̆ lơ̆m tơ drong hơ găt ‘lơ̆ng đơ̆ng Luơ̆t pôk rơ̆ih, Luơ̆t pơ gơ̆r Kuôk hô̆i păng kiơ̆ lơ̆m pơ tho kơ sô̆ 36 đơ̆ng Anih pơ gơ̆r Trung ương, tơ drong tơ chơ̆t 45 đơ̆ng Anih tơm chĭnh trĭ ƀơm truh tơ drong jang pôk rơ̆ih. Lơ̆m noh, ‘ngoăih kơ 5 tơ drong ‘lơ̆ng kiơ̆ hơ găt đơ̆ng luơ̆t nhen: ‘lơ̆ng găh 1 jơ hngơ̆m đon hăm Đảng, teh đak, khôi luơ̆t teh đak; rim tơ drong găh  jang gơ̆h, jơ hngơ̆m đon ‘lơ̆ng, jơ hngơ̆m pran, tơ drong bơ̆ jang, vei tơ drong pơ vei hăm bơ ngai tăh hla...kŭm pơ ma hơ dăh tơ drong rim bơ ngai tang măt ‘noh jĭ athei nŭih, pơ̆n pơ ma, pơm jŭk yŭk trong hơ lâu lơ̆m tơ drong pơm kiơ̆ trong jang tơ gŭm khôi luơ̆t.”

Mĭnh ƀai hŏk hlôh vao đei iŏk đei dơ̆ng ‘măng pôk rơ̆ih âu oei jing tơ drong jang tơ dai đơ̆ng Jơ nŭm vei lăng pôk rơ̆ih teh đak, rim Anih jang pôk rơ̆ih dêh char, pơ lei tơm hăm rim anih jang chih kơ tơ̆ng ang lơ̆m prăt vă jê̆ 1 sơ năm âu ki. ‘Noh oei jing tơ drong vei sơ đơ̆ng tơ drong tơ păt, rơ đăh, kon pơ lei pơm tơm, hơ tŏ hơ nơ̆ng lơ̆m rim tơ drong jang hơ met ăn pôk rơ̆ih. Hơ tŏk ‘lơ̆ng hơ năp jang đơ̆ng Mặt trận Tổ quốc rim tơ ring păng rim khŭl jang lơ̆m tơ drong krao hơ vơn pơ trŭt kon pơ lei, bơ ngai tăh hla lơ̆m teh đak vang jang lơ̆m rim hơ yak ƀơ̆t kơ plăh pôk rơ̆ih. Kiơ̆ đơ̆ng noh, pơm tơ drong hiôk lui, chhôk hơ iă hăm ‘măng pôk rơ̆ih, hơ tŏk ‘lơ̆ng đon hlôh vao, tơ drong jang chĭnh trĭ đơ̆ng kon pơ lei vang jang pơ jing khŭl jang teh đak, khŭl kơ dră chĕp kơ̆l rim tơ ring. Ƀok Bùi Văn Cường, Tổng Thư ký Kuôk hô̆i, Kơ dră vei lăng Anih jang Kuôk hô̆i, Chánh Văn phòng Jơ nŭm vei lăng pôk rơ̆ih teh đak pơ ma hơ dăh:

“Tơ drong jang tơ roi tơ băt đei lơ tơ plih ‘lơ̆ng păng iŏk đei jơ nei kơ jung, khŭl jang tơ roi tơ băt hlôi đei hơ met kơ jăp. Trong jang tơ roi tơ băt kŭm hlôi đei hơ met ăn păng tơ drong tơ roi tơ băt kŭm tôch kơ ƀlep tơ drong tơm. Tơ drong ‘noh pơm ăn jơ hngơ̆m đon chhôk ‘nă ăn bơ ngai tăh hla păng kon pơ lei lơ̆m teh đak. Tơ̆ âu nhôn ƀôh rim kơ dră chĕp kơ̆l Đảng,  teh đak ƀơ̆t bơ̆ jang tơ drong gơ̆h jang đơ̆ng kon pơ lei ‘noh adoi đei rim anih jang tơ roi tơ băt 1 trong tôch kơ tơ tom, lang să jơ hngơ̆m đon ‘lơ̆ng vă bơ̆n tơ lĕch jang ‘măng pôk rơ̆ih jơ nei”.

 Jơ nei đơ̆ng ‘măng pôk rơ̆ih bơ ngai tang măt Kuôk hô̆i jăl 15 păng bơ ngai tang măt Jơ nŭm pơ gơ̆r kon pơ lei rim tơ ring jăl jang 2021-2026 hlôi ăn ƀôh jơ hngơ̆m đon hơ drĕch hơ drŭng, tơ drong mơ̆t jang kơ tang, kơ pal hơ la 1 jơ hngơ̆m đon đơ̆ng pơ đĭ khŭl jang chĭnh trĭ, ling lang ‘lơ̆ng mă đơ̆ng lơ̆m rim tơ drong jĭ hơ buh, mơ mat tat. Tơ drong lăp đon păng đon tơ năp đơ̆ng vă jê̆ 70 triệu ‘nu bơ ngai tăh hla kŭm jing tơ drong tơm gĭt kăl tơ gop lơ̆m jơ nei đơ̆ng ‘măng pôk rơ̆ih yua kơ 1 tơ drong ƀônh ƀŏ “ hơ nat rơ bâu ‘măng kon pơ lei jang kŭm đang”.

Lại Hoa, VOV1:Chih

Thuem: Tơ blơ̆