VOV4.Bahnar - Ƀok  Dương Văn Trang – Bơ ngai jang lơ̆m Trung ương Đảng, Bí thư Anih jang Đảng dêh char Kon Tum ‘nao đei jơ bơ̆ jang hăm kang ƀô̆, khŭl linh Kơ đông linh vei lăng tơ ring sơ lam Rơ Long (xăh Đăk Long, apŭng Đăk Glei). Tơ̆ jơ bơ̆ jang, Kơ đông linh vei lăng tơ ring sơ lam Rơ Long apĭnh; Rim kơ dră bơ ngơ̆t truh hơ met ming dơ̆ng trong dăr  joang tơ ring sơ lam yua đơ̆ng hơ nơ̆ng teh hơ lih tĭh lơ̆m pơ yan ‘mi ƀơm kơ nê̆ truh bơ̆ jang tơ drong jang; ming man trong iĕ tơ ƀư̆h trong dăr joang năm tơ̆ rim hơ nih jrăng sơ lam teh đak, pơm dur var sơ lam, tŭn hrĕnh tơ drong jang pơm ŭnh điên tơ̆k hơ dăh, pơm hơ tŏk ming ‘măng jang sơ lam iĕ Đăk Long tŏk ‘măng jang sơ lam tơm pơ yua ăn tơ mang lăng păng tơ plih băl tơ mam drăm.

Lơ̆m jơ bơ̆ jang

Ƀok Dương Văn Trang - Bí thư anih jang Đảng dêh char Kon Tum tơ tă, lơ̆m kơ plăh dăr joang vei lăng trong sơ lam , jrăng sơ lam kăl kơ jang hơ dai bơ̆ jang kiơ̆ tơ drong jang vei lăng bri. Anih tơm pơ gơ̆r Ƀô̆ đô̆i vei lăng tơ ring sơ lam dêh char păng Kơ đông linh vei lăng tơ ring sơ lam Rơ Long athei hơ nơ̆ng pơ lung kang ƀô̆, khŭl linh jang đang ‘lơ̆ng tơ drong jang đei pơ jao. Kơ đông linh vei lăng tơ ring sơ lam Đăk Long kăl kơ pơ gơ̆r pơm ‘nhŏng oh hăm Đăk Long, jang tơ gŭm ăn kơ xăh lơ̆m tơ drong jang pơ jing kơ dră Đảng, khŭl kơ dră xăh păng tơ gŭm kon pơ lei băt trong jang sa, tơ jur dơ nuh hin păng pơ jing tơ ring tơ rang ‘nao.

Thuem: Tơ blơ̆