VOV4.Bahnar - Kơsơ̆ năr 24/3, ƀok Dương Văn Trang - Kơdră jang lơ̆m Trung ương Đảng, Bí thư Đảng dêh char pơm tơm jơ bơ̆ jang hăm Khŭl bơngai mơdro sa sơnăm mơlô̆h dêh char.

Bí thư Đảng dêh char Kon Tum iung pơma lơ̆m jơ bơ̆ jang

Đei pơjing đơ̆ng khei 12/2020, Khŭl mơdro sa sơnăm mơlô̆h dêh char Kon Tum dang ei đei 154 ‘nu bơngai hăm 10 khŭl iĕ, 11 câu lạc bộ. Rim khŭl hlôi pơgĕnh dôm tơdrong đei, rong jơnei đông trùng hạ thảo; pơtăm, pơm tơlĕch, tĕch mơdro prit ŭnh; pơm tơlĕch păng tĕch mơdro rim tơmam drăm đơ̆ng chehphe; pơm tơlĕch, atŏk tơ iung rim tơmam drăm pơm pơrŏ. Khŭl mơdro sa sơnăm mơlô̆h Kon Tum hlôi pơgơ̆r lơ tơdrong jang vei lăng năng tông tơdrong erĭh sa tơpôl, tơgŭm djru rim bơngai tơnap tap hăm kơ jă kơ jên hlŏh 160 trĭu hlak jên. Iung pơma tơ̆ jơ bơ̆ jang, Bí thư Đảng dêh char  Kon Tum lui kơ rim bơngai mơdro sa sơnăm mơlô̆h, hơnĭh mơdro sa ‘nao gô tơchă đei trong jang ‘nao vă iung jang ‘lơ̆ng 2 tơdrong đei kơ dêh char nhen: tơmang pơ hiơ̆ păng ‘long pơgang. Khei năr kơnh, rim hơnĭh mơdro sa kăl tơgŭm djru pơih să mơdro sa, atŏk kơtang tơgoăt jang hơdoi hăm hơnĭh mơdro sa dêh char boăl vă atŏk tơ iung kmăi kmŏk pơm tơlĕch tơmam drăm, mă kăl pơm tơlĕch sâm hroi, tơmam drăm chŏh jang sa lăng trŭh tĕch mơdro tơ̆ tĕh đak đe, pơjing đei tơmam drăm gĭt kăl kơ Kon Tum.

Tơblơ̆ nơ̆r: Amazưt