VOV4.Bahnar - Ƀok Dương Văn Trang – Kơ dră jang lơ̆m Trung ương Đảng, Bí thư Đảng dêh char Kon Tum ‘nao dăr hơ len năng tơ drong vei lăng păng atŏk tơ iung bri tơ̆ xăh Đăk Tăng, apŭng Kon Plông.

Bí thư Đảng dêh char tơ tă ăn xăh Đăk Tăng athei vei lăng ‘lơ̆ng 630 tơm ‘long hơ ngo 5 hlak hla dang ei. ‘Nâu jĭ kơ loăi ‘long hơ ngo đei kơ tăk lơ ƀiơ̆ kơ ‘long hơ ngo 3 hlak hla, đei tơm ‘long tôch ‘lơ̆ng, lăp hăm tơ drong pơ tăm tơ̆ dôm anih jang, hnam trưng. Hrei ‘nâu, Anih vei lăng Tơ ring choh jang xa hăm kơ măy kơ mŏk ‘nao Măng Đen hlôi ơng đei dang 400 tơ đăh ‘long hơ ngo 5 hlak hla.

Bí thư Đảng dêh char Kon Tum athei apŭng Kon Plông hơ nơ̆ng pơ tho ăn Anih vei lăng tơ ring choh jang xa hăm kơ măy kơ mŏk ‘nao Măng Đen pơm tơ lĕch tơ đăh ‘long hơ ngo âu vă pơih xă tơ ring pơ tăm, pơ yoa ăn tơ drong chă tơ mang lăng, hơ tŏk yơ̆p bri, chă tơ drong jang, đei iŏk yoa ăn kon pơ lei đơ̆ng chrek iŏk kơ tăk păng tơm ‘long hơ ngo.

Dơ̆ng: Tơ blơ̆