VOV4.Bahnar - Tơ drong jang chĭnh trĭ đơ̆ng Binh đoàn 15 đei khŭl kơ dră teh đak, Anih tơm vei lăng khŭl linh pơ jao ‘noh jĭ: Hơ tŏk tơ iung mŭk drăm tơ klep hăm hơ met ming vei lăng teh đak, pơ jing kon pơ lei oei sa – tơ pôl lơ̆m tơ ring Tây Nguyên. Đơ̆ng rŏng hloh 35 sơ năm bơ̆ jang, rim anih jang, anih mơ dro sa găh Binh đoàn hlôi tơ klep kơ jăp hăm 270 pơ lei kơ 33 xăh, phường, thị trấn găh 4 dêh char: Gia Lai, Kon Tum, Bình Định, Quảng Bình. Hơ dai hăm pơm tơ lĕch, tĕch mơ dro đei iŏk yua, rim anih jang ling lang bơ ngơ̆t truh, vei lăng tơ drong arih sa ăn bơ ngai jang.

Xăh sơ lam Ia Đal, apŭng Ia H’Drai, dêh char Kon Tum jĭ tơ ring tôch kơ mơ mat tat, đei lơ kon pơ lei kon kông arih sa. Hăm tơ drong jang hơ tŏk tơ iung mŭk drăm – tơ pôl tơ klep hăm vei sơ đơ̆ng teh đak, Binh đoàn 15 (găh Anih tơm vei lăng khŭl linh) hlôi pơ jing Kŏng ti 716. 12 khŭl jang sa kơ kŏng ti đei pơ jing, lơ̆m noh găh lơ bơ ngai jang ‘noh jĭ bơ ngai kon kông kơ tă anih. ‘Nhŏng Quách Công Quản jĭ 1 lơ̆m dôm bơ ngai mă blŭng đei Kŏng ti 716 sơng iŏk mơ̆t jang kŏng nhân, đei iŏk yua sơ đơ̆ng hloh 6 triêụ hlak jên 1 khei tơ roi:

“Iŏk đơ̆ng nhôn mơ̆t tơ̆ âu kŭm 7 sơ năm, tơ drong jang đon tơ chĕng ‘noh kŭm sơ đơ̆ng. Mơ̆t jang kŏng nhân ‘noh băt hơ dăh jang đunh đai, tơ klep hăm anih jang, đei rim đe ‘nhŏng kơ dră kơ pal ‘noh kŭm pơ tho, đang kơ ‘noh jang kŏng nhân hơ dai hăm jang mŭk drăm ‘noh tơ drong arih sa kŭm sơ đơ̆ng mơ̆n”.

Hăm 35 sơ năm jang tơ drong jang pơ jing mŭk drăm hai, vei lăng sơ đơ̆ng tơ ring sơ lam hai, Binh đoàn 15 hlôi tơ iung đei 44.000 hek tar ‘long pơ tăm tơ̆ tơ ring sơ lam găh tu Tây Nguyên, Lào păng Campuchia. Sơ năm sơ̆, iŏk yua đơ̆ng anih jang đei hloh 2000 ti hlak jên, pơm tơ drong jang păng iŏk yua sơ đơ̆ng ăn kơ 17.000 ‘nu bơ ngai jang (lơ̆m noh đei vă jê̆ 8.000 ‘nu bơ ngai jang ‘noh jĭ bơ ngai kon kông kơ tă anih). Rim kŏng ti găh sư hlôi pơm ‘nhŏng oh hăm 270 pơ lei, pơ gơ̆r ăn kơ hloh 4.600 ŭnh hnam kŏng nhân bơ ngai Yuăn tơ klep hơ dai hăm ŭnh hnam bơ ngai kon kông.

Binh đoàn 15 pơ jao hnam “ Tơ goăt tơ goăl” ăn kŏng nhân

Hơ dai hăm ‘noh, binh đoàn kŭm ming man đei lơ hnam trưng hŏk, hnam pơ gang; tơ mơ̆t jên jang pơm ‘nao kơ hrĕng km trong ŭnh điên păng rơ bâu km trong nơ năm. Dôm tơ drong jang âu hlôi tơ gop tơ gŭm kon pơ lei sut pơ ngot tơ jur dơ nuh hin, pơ jing tơ ring tơ rang ‘nao, hơ tŏk tơ iung pơ tho pơ hrăm păng jang pơ gang tơ̆ tơ ring. Đại tá Trần Quang Song, sơ̆ pơm Kơ dră chĭnh trĭ Binh đoàn 15 jĭ bơ ngai hlôi tơ klep đunh sơ năm hăm kon pơ lei Tây Nguyên, kơ na đei lơ đon ƀlŏk băt gĭt kăl:

“Tơ klep hơ dai hăm kon pơ lei tơ̆ binh đoàn 15 ‘noh tôch kơ hơ drô̆: Tơ klep lơ̆m tơ drong arih sa, lơ̆m pơ gơ̆r jang sa, tơ drong pơ vei tơ pôl; tơ klep đơ̆ng ‘lơ̆p sơ̆, sơ năm mơ lôh ding truh kră păng lôch hơ chăng, bơ ngơ̆t truh băl pơ đĭ lơ̆m tơ drong arih đon lui, năr chơt, năr sơ ‘ngon. Tôch kơ ‘meh ‘noh binh đoàn pơm ‘lơ̆ng hloh dơ̆ng tơ drong joăt joe gĭt kăl âu, hơ nơ̆ng jang kiơ̆ jơ nei rim tơ drong jang.”

Lơ̆m sơ năm âu ki, hăm dôm tơ drong tơ plih ư̆h kơ ‘lơ̆ng đơ̆ng anih tĕch mơ dro tơ mam choh jang sa, iŏk yua đơ̆ng kơ su păng cheh phe tơ jur kơ tang ngăl, mă lei Binh đoàn 15 oei  vei sơ đơ̆ng ‘lơ̆ng tơ drong arih sa kơ kang ƀô̆ khŭl linh păng bơ ngai jang, pơm tơ drong ‘lơ̆ng vă bơ ngai jang tơ klep hăm binh đoàn, sơ đơ̆ng pơ jing pơ lei pơ la. Binh đoàn 15 jang kiơ̆ đei iŏk yua rim tơ drong jang vei sơ đơ̆ng tơ drong arih sa tơ pôl nhen “ Khŭl linh 1 jơ hngơ̆m pơ jing tơ ring tơ rang ‘nao”, “ Khŭl linh tơ gŭm băl yua kơ bơ ngai dơ nuh hin”. Ƀôh hơ dăh, vă jê̆ 300 tŏ hnam ‘mêm mơ nat, hnam tơ goăt tơ goăl, hloh 260 km trong nơ năm, 120 km hơ bong thong đak đei pơm ‘nao, hơ met ming. Kơ hrĕng tấn phe đei gơ̆ih truh ŭnh hnam dơ nuh hin lơ̆m pơ yan ƀa tŏk bŏk hoăt.

Binh đoàn 15 pơ jao phe tơ gŭm kŏng nhan dơ nuh hin păng bơ ngai kon kông

‘Nao âu, ƀlep ƀơ̆t năm pơm lêh tơ băt 35 sơ năm pơ jing Binh đoàn 15, Thượng tướng Trần Đơn, Bơ ngai jang lơ̆m Trung ương Đảng, Phŏ kơ dră Anih tơm vei lăng khŭl linh hlôi chih iŏk dôm tơ drong hơ drin, hơ gei đơ̆ng kang ƀô̆, khŭl linh, bơ ngai jang khŭl linh păng bơ ngai jang Binh đoàn. Hơ dai hăm ‘noh, athei anih jang hơ nơ̆ng jang kiơ̆ ‘lơ̆ng tơ drong jang tơ klep hăm bơ ngai jang, mă loi ‘noh jĭ bơ ngai kon kông.

“Binh đoàn 15 kăl kơ hơ nơ̆ng jang kiơ̆ trong jang kăl Binh đoàn tơ klep hăm dêh char – apŭng; kŏng ti tơ klep hăm apŭng – xăh; grŭp jang sa tơ klep hăm pơ lei pơ la; ŭnh hnam bơ ngai Yuăn tơ klep hăm ŭnh hnam bơ ngai kon kông; tơ goăt tơ goăl, tơ klep hăm kơ dră đảng, kơ dră chĕp kơ̆l, kon pơ lei lơ̆m tơ ring. Mă loi ‘noh jĭ athei hơ met ăn păng pơ gơ̆r ‘lơ̆ng Hop akŏm đảng rim tơ ring yak truh Hop akŏm 13 kơ Đảng; tơ chĕng hơ len tơ drong lơ̆m tơ ring, đơ̆ng noh pơ jing hla ar chih tơ drong tơ chơ̆t hop akŏm păng tơ lĕch trong jang sa, tĕch mơ dro mă lăp.

      Tơ̆ hop akŏm bơ ngai tang măt ‘măng mă 13, jăl jang 2020-2025, Đảng bộ Binh đoàn 15 băt hơ dăh khei ‘năr truh kơnh gô tơ lĕch jang rim tơ drong jang hơ dai mơ dro sa, jang hơ dai, hơ met ming dơ̆ng tơ drong jang kiơ̆ trong lơ tơ drong jang pơm tơ lĕch tĕch mơ dro, hơ tŏk ‘lơ̆ng tơ mam pơm lăp hăm ‘mĕh vă pơ̆ih să anih tĕch mơ dro. Tơ drong tơm iŏk đei kơ jă pơm tơ lĕch đei 9.800 ti hlak jên, iŏk yua đei 8.700 ti hlak jên./.

Thuem: Tơ blơ̆