VOV4.Bahnar - Vă vei sơ đơ̆ng ăn bơ ngai jang tơ̆ hơ năp tơ drong krê hơ mơt đơ̆ng jĭ Covid-19, Binh đoàn 15 hlôi tơ lĕch tơ drong jang tang găn jĭ kiơ̆ trong “Tang găn jĭ nhen tơ blăh hơ yăt”. Hơ dai hăm ‘nŏh, ‘ngoăih kơ vei lăng ‘lơ̆ng tơ drong jang xa, tĕch mơ dro, anih jang oei tơ rĕk truh tơ drong tơ gŭm, vei lăng tơ drong arih xa ăn công nhân, bơ ngai jang.

Hơ nơ̆ng ƀât 11 jơ ‘năr dơ̆ng rim năr, anih mong akŏm kơ tăh cao su kơ Khul 2, Công ty 72 (apŭng Đức Cơ, dêh char Gia Lai) Binh đoàn 15 ơ ơ̆r nơ̆r pơ ma hiĕk đơ̆ng đe thơ̆ chrek kơ tăk cao su vih. Đe sư chơt hơ iă đơ̆ng rŏng 1 măng gleh hrat, iŏk đei kơ tăk lơ păng 'lơ̆ng. Lơ̆m jơ bơ̆ jang, rim công nhân hơ nơ̆ng gom muh măt, pơ tŏ hơ len hơ yuh hơ kâu păng dơ̆ng hơ tăih băl kiơ̆ nơ̆r pơ tho mưh pơ jao kơ tăk, dôm tơ drong juăt hơ nơ̆ng athei đe sư pơm kiơ̆ iŏk đơ̆ng jĭ Covid –19 tơ pŏh.

Đe kăn ƀô̆, công nhân đơ̆ng Binh đoàn 15 hơ nơ̆ng pơm kiơ̆ trong tang găn jĭ mưh bơ̆ jang

Mŏ Siu H’Yien, công nhân chrek kơ tăk cao su Khul 2, Công ty 72, (apŭng Đức Cơ, dêh char Gia Lai) Binh đoàn 15 tơ roi: “Tơ̆ âu đĭ đăng ‘nhŏng ŏh pơm công nhân jang kiơ̆ ‘lơ̆ng trong tang găn jĭ, ưh đei chă yak kư̆ kă păng bơ̆ jang hơ nơ̆ng dơ̆ng hơ tăih băl 2m, hơ drô̆ unh hnam nhôn đei 6 ‘nu pơm công nhân mă lei nhôn hơ nơ̆ng đei đon tang găn jĭ mă tơ̆ hnam dăh mă năm jang”.

Tơ̆ dôm hnam kơ măy ep kơ tăk cao su, Binh đoàn 15 vei kơ jăp tơ drong jang xa sơ đơ̆ng ‘lơ̆ng. Hăm 1 hnam kơ măy ep kơ tăk, đa đei đơ̆ng 25 – 30 ‘nu bơ ngai jang mă lei dang ei pă đơ̆ng 10 - 15 ‘nu bơ ngai jang pơ lơ̆h băl đĕch vă tang găn jĭ. Công nhân, bơ ngai jang pơ dơ̆h tơ̆ hnam kơ măy đei vei lăng tôch ‘lơ̆ng. 

Bơ ngai jang đei pơ tŏ hơ yuh hơ kâu mưh năm jang

Thượng tá Phan Văn Phú, Phŏ Kơ dră chĕp kơ̆l Công ty 72, Binh đoàn 15 ăn tơ băt: “Khei ‘năr âu ki, khul linh tơ̆ tơ ring, vei kơ jăp tơ drong sơ đơ̆ng chinh trĭ, sơ đơ̆ng lơ̆m tơ pôl, sơ đơ̆ng tơ̆ tơ ring tơ rang. Nhôn chih hơ dăh athei tang găn jĭ mă ‘lơ̆ng lơ̆m anih jang, hơ met khul bơ ngai, tơ mam, tơ lĕch trong pơ vih vă kơ chăng bơ̆ jang tơ gŭm dôm khul grŭp, dôm tơ ring đei jĭ. Nhôn chih hơ dăh tơ̆ hơ năp kơnh hơ nơ̆ng vei kơ jăp tơ drong sơ đơ̆ng tơ̆ anih jang, tơ̆ tơ ring. Pơm ‘lơ̆ng ăn tơ drong jang xa, tĕch mơ dro đei iŏk yoa kơ jăp”

Đơ̆ng rŏng kơ Anih tơm vei lăng khul linh ƀơk vắc xin tang găn jĭ Covid - 19, Binh đoàn 15 pơ gơ̆r ƀet jrŭm mă 1 ăn 100% ‘nu kăn ƀô̆, linh, bơ ngai jang. Vă tơ drong ƀet bơ̆ng đei pơ gơ̆r sơ đơ̆ng, Binh đoàn 15 păng dôm anih jang tơ lĕch trong, pơ tâp pơ hrăm ăn kăn ƀô̆, bơ ngai jang pơ gang chă ƀet vắc xin, khăm hơ len, hơ met ăn dôm bơ ngai đei pơ gang blơ̆. Gơ nơm thoi nŏh, tơ drong ƀet bơ̆ng jĭ tơ̆ anih đei pơ gơ̆r ‘lơ̆ng trŏ khoa hŏk, tôch sơ đơ̆ng. 

Mŏ Lê Thị Liên, Khul 4, Công ty 72 (apŭng Đức Cơ, dêh char Gia Lai), Binh đoàn 15 ăn tơ băt: “Ƀât mă tơ drong jĭ oei tôch hơ mơt nhen hrei ‘nâu, đe ‘nhŏng ŏh công nhân nhôn kŭm tôch pơ ngơ̆t. Nhen inh âu jĭ công nhân chrek iŏk kơ tăk tơ̆ công ty 72 anih jang pơm tơ̆ tơ ring sơ lam, tơ ring hơ tăih yăih, đei Anih tơm vei lăng khul linh, Binh đoàn, công ty pơ jing tơ drong ‘lơ̆ng ăn ‘nhŏng ŏh nhôn ƀet vắc xin ‘nŏh nhôn tôch hơ iă, sơ đơ̆ng jơ hngâm. Đei ƀet vắc xin covid ‘nŏh nhôn ƀôh roi sơ đơ̆ng ƀiơ̆, adrin jang đang rim tơ drong đei pơ jao”

Đe kăn ƀô̆, linh, bơ ngai jang đei ƀet vắc xin tang găn jĭ

Lơ̆m 2 sơ năm âu ki, Binh đoàn 15 pơ jing trong jang kiơ̆ “4 kơ tă" vă jang đang ‘lơ̆ng 2 tơ drong tơm ‘nŏh jang kĕh ‘lơ̆ng tơ drong jang xa, tĕch mơ dro hơ dai hăm vei sơ đơ̆ng tĕh đak hai, tang găn ‘lơ̆ng tơ drong jĭ hai. Lơ̆m nŏh, Binh đoàn chih hơ dăh, roi tơ băt jĭ trong tang găn kơ jăp ‘lơ̆ng, vang vei lăng sơ đơ̆ng ăn anih jang păng tơ ring tơ̆ hơ năp tơ drong jĭ Covid-19. Đơ̆ng noh, tơ drong jang xa đei vei lăng sơ đơ̆ng, đe công nhân, bơ ngai jang đei tơ drong jang, đei jên khei sơ đơ̆ng.

Đại tá Lê Xuân Phương, Phŏ Kơ dră chĕp kơ̆l Binh đoàn 15 ăn tơ băt: “Vei lăng ‘lơ̆ng tơ drong arih xa, mă loi ‘nŏh jĭ jên khei ăn bơ ngai jang, kla tôch tơ tom, jô̆ păh lăp đơ̆ng 6 – 7 triu. Đe công nhân tôch sơ đơ̆ng jơ hngâm. Kăl loi, mưh công nhân sơ đơ̆ng jơ hngâm, lui kiơ̆ Binh đoàn ‘nŏh tơ drong tang găn jĭ kŭm tôch ‘lơ̆ng. Nhôn iŏk khul choh jang pơm kơ đông, khul choh jang vei lăng rim tơ drong nhen thoi 1 tơ pôl iĕ, bơ̆ jang ‘lơ̆ng rim tơ drong hơ găt. Truh dang ei, tơ drong tang găn jĭ đơ̆ng Binh đoàn tôch ‘lơ̆ng, đei yoa. Tơ drong jang xa, tĕch mơ dro sơ năm ‘nâu nhôn chih hơ dăh gô jang đei păng lơ hlŏh nơ̆r hơ găt đơ̆ng Anih tơm vei lăng khul linh tĕh đak pơ jao ăn Binh đoàn 15”.

 Hoàng Qui: Chih

Dơ̆ng: Tơ blơ̆