VOV4.Bahnar - Năr ‘nâu, 28/7, đơ̆ng 6 jơ kơ sơ̆ truh 5 jơ pơ gê đơ̆ng rŏng, kon pơ lei Bình Dương ưh gơ̆h lĕch tơ̆ trong vă tang găn jĭ, ưh kơ jô̆ bơ ngai jĭ jăl năm hơ met tơ̆ hnam pơ gang, bơ ngai bơ̆ jang ăn tĕh đak dăh mă bơ̆ jang kiơ̆ nơ̆r athei vă tang găn jĭ Covid-19.

‘Nâu jĭ nơ̆r pơ tho đơ̆ng kơ dră chĕp kơ̆l dêh char Bình Dương ƀât mă jĭ Covid-19 oei tơ pŏh tôch hơ mơt. Hrei ‘nâu, Bình Dương jĭ 1 lơ̆m dôm dêh char, plt đei kơ sô̆ bơ ngai jĭ Covid-19 tŏk hrĕnh hăm hlŏh 8.900 ‘nu, lơ̆m nŏh đei lơ bơ ngai tơ pŏh jĭ lơ̆m tơ pôl. Tơ ring oei bơ̆ jang pơ vang găn, ưh ăn yak vih vât lơ̆m tơ pôl kiơ̆ tơ drong Tơ chơ̆t 16 đơ̆ng Thủ tướng tĕh đak.

Mă lei, kiơ̆ tơ drong tơ chĕng đơ̆ng dôm khul jang kơ Trung ương păng Anih tơm vei lăng jang pơ gang, kon pơ lei Bình Dương oei ưh đei đon kơ chăng, lăng pơ hơi tơ drong tang găn jĭ păng kơ sô̆ bơ ngai jĭ lĕch tơ̆ trong oei lơ, mă loi ‘nŏh tơ̆ dôm anih kơ drâm lơ̆m apŭng, thĭ xăh, plt. Vă tơ jur ƀiơ̆ jĭ tơ pŏh, dôm tơ ring lơ̆m dêh char pơm lơ anih gak vei lăng bơ ngai păng gre mât lĕch; atŭm hăm ‘nŏh dăr hơ len, sek tơ lang tơ păt dôm bơ ngai pơm glăi tơ drong tơ chơ̆t 16.

Dơ̆ng: Tơ blơ̆