VOV4.Bahnar - Gơ măng hei (19/11), lêh ƀlŏk hơ dơ̆r kơ kon pơ lei lôch lơ̆m jĭ hơ buh COVID-19 pơ gơ̆r tơ̆ hơ nih pơ dăh ti vi tơm ‘noh jĭ anih hop akŏm tơm Thống Nhất, pơ lei tơm Hồ Chí Minh păng Cham ngôi pơ hiơ̆ Thống Nhất, pơ lei tơm Hà Nội. Tơ̆ hơ nih pơ dăh ti vi tơm tơ̆ Anih hop akŏm tơm Thống Nhất, pơ lei tơm Hồ Chí Minh, rim kơ dră chĕp kơ̆l Đảng, teh đak đei măt lơ̆m jơ pơm lêh pơm kiơ̆ tơ drong joăt soh nhang, dan pơ kao ƀlŏk hơ dơ̆r kơ unh hnam, kon pơ lei, kon pơ lei đơ̆ng teh đak bơ̆n oei tơ̆ teh đak đe, khŭl linh lơ̆m teh đak hlôi lôch hơ chăng yua đơ̆ng jĭ COVID-19.

Tang măt Đảng păng teh đak, ƀok Đỗ Văn Chiến, Bí thư Trung ương Đảng, Kơ dră Anih jang Mặt trận Tổ quốc Việt Nam tơ ƀôh đon ‘mêm pă băt dang yơ, vang ơh sơ ‘ngon hăm rim ŭnh hnam đei bơ ngai lôch lơ̆m jĭ hơ buh COVID-19. Ƀok Chiến pơ ma hơ dăh, yua đơ̆ng jĭ hơ buh kơ tang, krê hơ mơt kơ na mă đơ̆ng tôch kơ hơ drin ră, mă lei đei lơ bơ ngai ƀơ̆t lôch tam mă đei pơ gơ̆r pơ dong pơ ‘lơ̆ng kiơ̆ tơ drong joăt oei sa.

Truh ‘năr  19/11, lơ̆m teh đak chih iŏk hloh 23.000 ‘nu lôch yua kơ jĭ COVID-19, lơ̆m noh pơ lei tơm Hồ Chí Minh đei hloh 74% hăm hloh 17.000 ‘nu lôch. Jĭ hơ buh COVID-19 hlôi pơm ăn hiong răm lơ tơ drong, pơm băt dôm yơ ơh sơ ‘ngon. Ƀlŏk hơ dơ̆r kơ dôm bơ ngai lôch kŭm jing nơ̆r tơ tă kơ rim ‘nu bơ̆n găh tơ drong krưp krĕnh đơ̆ng jĭ hơ buh. Dang ei, tơ drong jang tơ jră hăm COVID-19 oei hơ nơ̆ng kơ đei, bơ̆n athei mă pran hloh kơ hơ drol, ưh kơ gơh pơm pơ hơi.

Thuem: Tơ blơ̆