VOV4.Bahnar - ‘Năr (8/7), Anih chĕp kơ̆l pơ gơ̆r khul linh ƀô đô̆i vei lăng tơ ring sơ lam dêh char Dak Nông pơ gơ̆r hop akŏm pơ tôch tơ drong jang 6 khei blŭng sơ năm 2021.

Hop akŏm Anih chĕp kơ̆l pơ gơ̆r khul linh vei lăng tơ ring sơ lam Dak Nông

 Kiơ̆ Anih chĕp kơ̆l pơ gơ̆r khul linh vei lăng tơ ring sơ lam Dak Nông, 1 puăt blŭng sơ năm ‘nâu, tơ drong sơ đơ̆ng tơ̆ tơ ring sơ lam dêh char đei vei lăng ‘lơ̆ng; tơ drong găn đe tĕch mơ dro ôn, mât lĕch glăi luơ̆t păng tang găn jĭ Covid-19 đei jơ nei ‘lơ̆ng. Kŭm hăm vei lăng sơ đơ̆ng tơ̆ tơ ring sơ lam, ƀô đô̆i vei lăng tơ ring sơ lam Dak Nông oei tơ gŭm ăn kon pơ lei 1.250 năr jang, tơ gŭm ăn kon pơ lei pơm vă jê̆ 6km trong nơ năm, hơ met ming 6 tŏ hnam ăn dôm unh hnam đei tơ drong arih xa mơ mat tat.

Anih chĕp kơ̆l pơ gơ̆r khul linh ƀô đô̆i vei lăng tơ ring sơ lam dêh char Dak Nông ăn tơ băt, tơ̆ hơ năp kơnh, khul linh ƀô đô̆i vei lăng tơ ring sơ lam hơ nơ̆ng hơ tŏk tơ drong roi tơ băt, krao hơ vơn kon pơ lei tơ̆ tơ ring sơ lam lê̆ tơ gŭm, vei ôn, chông ba trong ăn bơ ngai mât lĕch glăi luơ̆t. Atŭm hăm ‘nŏh, dôm khul linh hơ tŏk loi dơ̆ng tơ drong jang đĭ đăng kon pơ lei vang tơ kêng tơ hlâu dôm bơ ngai chă trong mât tơ̆ Việt Nam glăi luơ̆t.

Dơ̆ng: Tơ blơ̆