VOV4.Bahnar - Hop akŏm Khul bơ̆ jang lơ̆m tơ pôl kơ ASEAN ‘măng mă 10 hăm hơ năn “Bơ ngai jang lơ̆m tơ pôl jĭ Khul jang tơm lơ̆m tơ drong jang atŏk tơ iung dơ̆ng đơ̆ng rŏng jĭ Covid-19” đei pơ gơ̆r pơ gê 21/9 kiơ̆ trong trư̆k tuyê̆n. ‘Nâu jĭ tơ drong jang yoa Anih tơm vei lăng bơ ngai jang, linh jĭ rơ ka păng tơ pôl tĕh đak bơ̆n– hăm tơ drong jang pơm Kơ dră vei lăng Khul bơ̆ jang lơ̆m tơ pôl ASEAN đơ̆ng 2020-2021 pơ gơ̆r. Hop akŏm đei tơ drong vang akŏm trư̆k tuyê̆n đơ̆ng dôm kuan tih, khul vei lăng dôm anih jang hơ doi gĭt kăl kơ ASEAN.

Hăm tơ drong jang pơm Kơ dră vei lăng khul bơ̆ jang lơ̆m tơ pôl ASEAN đơ̆ng 2020-2021, Việt Nam hlôi jang hơ doi kơ jăp hăm dôm tĕh đak lơ̆m ASEAN, Anih mong jên tơ gŭm ăn hơ iŏh Liên Hợp quốc păng dôm anih jang hơ doi hơ tŏk tơ drong chih pơ jing păng hơ met pơ kĕh trong jang kiơ̆ Nơ̆r tơ chơ̆t Hà Nội găh hơ tŏk tơ drong jang lơ̆m tơ pôl năm truh Tơ pôl ASEAN kơ jăp ‘lơ̆ng păng kơ chăng jang kiơ̆ vă chih tơ roi ăn Hop akŏm tih ASEAN ‘măng mă 38 vă chih tơ băt lơ̆m khei 10 truh.

Tơ̆ hop akŏm, bơ ngai tang măt ăn dôm anih jang kơ pal kơ ASEAN păng dôm anih jang hơ doi, vang pơ ma nuh găh đon tơ chĕng hăm tơ drong jang đơ̆ng anih jang lơ̆m tơ pôl mưh tang găn jĭ păng jang tŏk dơ̆ng đơ̆ng rŏng kơ jĭ COVID-19, lơ̆m nŏh akŏm lơ̆m tơ drong jang pơ gang păng pơ vih lơ̆m tơ pôl. Lơ̆m ‘măng hop akŏm đei pơ gơ̆r hloi lêh tơ băt 10 sơ năm pơ jing Khul bơ̆ jang lơ̆m tơ pôl ASEAN (2011-2021).

Dơ̆ng: Tơ blơ̆