VOV4.Bahnar - Gơ măng 2/7, Dơ nŏ anih vei lăng kon pơ lei dêh char Lâm Đồng pơ gơ̆r hôp trư̆k tuyê̆n hăm anih jang kơ pal, Dơ nŏ anih vei lăng kon pơ lei dôm apŭng, plt lơ̆m dêh char vă tơ lĕch trong tang găn jĭ đơ̆ng rŏng đei bơ ngai tơ pŏh jĭ Covid-19 tơ̆ dêh char. Bơ ngai đei năng tơ pŏh pơ rang jĭ SARS-CoV-2 mă blŭng tơ̆ Lâm Đồng âu ‘nŏh drŏ kăn (46 sơ năm, oei tơ̆ apŭng Đạ Tẻh). Bơ ngai jĭ hăm klo sư, ƀok N.M.H, tĕch plei ‘long tơ̆ kơ chơ mong akŏm tơ mam Hóc Môn (plt HCM) đơ̆ng ‘năr 19/6 truh 25/6. ‘Năr 26/6, ƀok N.M.H. chơ kăn sư hăm gre hon đa đơ̆ng Hóc Môn vih tơ̆ hnam tơ̆ plei Phú Hòa, xăh Mỹ Đức, apŭng Đạ Tẻh, dêh char Lâm Đồng.

Dêh char Lâm Đồng pơ gơ̆r hôp hăt hot lơ̆m gơ măng vă tơ lĕch hloi trong tang găn jĭ

Truh 22h30’ gơ măng 30/6, hơ kăn ƀok yuh, hiĕn kơ na năm chih tơ roi găh jơ hngâm jăn tơ̆ Hnam pơ gang xăh Mỹ Đức. Anih jang pơ gang hăt hot ăn oei hơ drô̆, iŏk set hơ len pham ‘nŏh ƀôh đei pơ rang jĭ SAR-CoV-2. Kiơ̆ ƀok Tống Giang Nam, Kơ dră vei lăng kon pơ lei apŭng Đạ Tẻh, klo kăn ƀok H. ƀât đơ̆ng Hóc Môn vih hlôi năm klĕch anih gak hơ len năng jĭ kơ apŭng mă lei tơ roi găh jơ hngâm jăn ưh kơ trŏ. Đơ̆ng rŏng băt đei bơ ngai jĭ, apŭng hlôi pơ vang găn pơ lei Phú Hòa păng tơ lĕch lơ trong jang tang găn jĭ. Dang ei tơ drong chă hơ len bơ ngai tơ bâp, ăn oei hơ drô̆, iŏk set hơ len pham hăm dôm bơ ngai ngôi hơ dai hăm bơ ngai jĭ tŏk bŏk đei dêh char Lâm Đồng bơ̆ jang tôch ai.

Dơ̆ng: Tơ blơ̆