VOV4.Bahnar - Bơ ngai jĭ pơ rang tơ plih Omicron mă blŭng tơ̆ Việt Nam hlôi đei tơ̆ teh đak bơ̆n. Kơ tơ̆ng ang âu đei khŭl jang dăr hơ len tơ drong jĭ tơ poh Việt Nam tơ roi tơ băt tam mă tôm đơ̆ng Hnam pơ gang Trung ương Quân đội 108  tơ roi tơ băt ăn Anih tơm vei lăng găh jang pơ gang. ‘Năr 19/12/2021, Hnam pơ gang Trung ương Quân đội 108 sơng iŏk 1 ‘nu tơ moi hao lơ̆m gre păr QH9028 đơ̆ng teh đak Anh vih tơ̆ Việt Nam. Test tơ̆ cham gre păr đei ƀôh jĭ hăm SARS-CoV-2. Hăm tơ drong đei ƀôh pơ rang jĭ đơ̆ng bơ ngai jĭ ‘nohtơ moi vih đơ̆ng teh đak Anh, ‘năr 20/12/2021, Hnam pơ gang hlôi pơ gơ̆r tơ ƀlang hơ len tơ drong gene SARS-CoV-2 đei tơ̆ bơ ngai jĭ âu hăm trong jang ‘nao, đei ƀôh ưh kơ ê ‘noh đei jĭ pơ rang tơ plih ‘nao Omicron. ‘Nâu jĭ bơ ngai jĭ pơ rang tơ plih Omicron mă blŭng đei tơ̆ Việt Nam, jĭ bơ ngai mơ̆t tơ̆ teh đak bơ̆n hlôi đei ăn oei hơ drô̆, vei lăng tơ tom lăp đơ̆ng rŏng kơ mơ̆t tơ̆ teh đak bơ̆n. Anih tơm vei lăng găh jang pơ gang tơ băt tŏk bŏk hơ nơ̆ng dăr hơ len kơ jăp tơ drong jĭ COVID-19 pơ ma atŭm păng tơ drong đei jĭ pơ rang tơ plih Omicron pơ ma hơ drô̆. Hơ dai hăm tơ tă kơ kon pơ lei pơm kiơ̆ rim trong jang tang găn jĭ COVID-19 păng ƀet bơ̆ng tôm.

Thuem: Tơ bơ̆