VOV4.Bahnar - Lơ̆m 9 khei âu ki, jô̆ păh lăp 1 khei đei hlŏh 10 rơ bâu anih tĕch mơ dro tang ‘măng pơ dơ̆h jang, oei kơ sô̆ anih tĕch mơ dro ‘nao pơ jing păng kơ sô̆ jên đei kĭ pơ kăp vă jang xa kŭm jur ƀiơ̆ pơ têng kơ khei âu sơ năm sơ̆. Tơ̆ hơ năp dôm tơ drong mơ mat tat đơ̆ng anih tĕch mơ dro, Thủ tướng tĕh đak đei nơ̆r pơ tho tôch rơ đăh ‘nŏh arih xa hơ dai sơ đơ̆ng ‘lơ̆ng hăm jĭ Covid vă jang tŏk mŭk drăm.

Kiơ̆ kơ sô̆ đơ̆ng Anih chih jô̆, yoa ƀơm kơ nê̆ đơ̆ng jĭ Covid-19, tĕch mơ dro đei lơ tơ drong tơ hlăk, 9 khei âu ki đei hlŏh 90 rơ bâu anih tĕch mơ dro tang ‘măng, tŏk 15,3% pơ têng hăm khei âu sơ năm sơ̆ (jô̆ păh lăp 1 khei hlŏh 10 rơ bâu anih tĕch mơ dro tang ‘măng pơ dơ̆h jang). Lơ̆m 9 khei âu ki mơ̆n, lăp dang 85 rơ bâu anih tĕch mơ dro pơ jing ‘nao, jur 13,6% pơ têng hăm khei âu sơ năm sơ̆. Kŭm hăm ‘nŏh, jên kĭ pơ kăp tơ mât jang kŭm jur ƀiơ̆ pơ têng hăm khei âu sơ năm sơ̆.

Ƀok Phạm Đình Thuý – Kơ dră Lăm chih jô̆ găh kơ măy kơ mŏk păng ming man lơ̆m Anih chih jô̆, găh Anih tơm tơ lĕch nơ̆r sơ kơ̆t tơ mât jên jang akhan: “Covid đei đơ̆ng blŭng sơ năm 2020, truh dang ei đĭ vă jê̆ 2 sơ năm bơih. Kơ sư̆k pơ krơ̆ng đơ̆ng anih tĕch mơ dro vă pă đei bơih. Tam đei sơ năm yơ kơ sô̆ anih jang ‘nao pơ jing tŏ sĕ hlŏh anih pơ dơ̆h jang nhen sơ năm ‘nâu”.

Ƀok Nguyễn Quang Huân – Bơ ngai tang măt Kuô̆k hô̆i jăl 15, Phŏ Kơ dră vei lăng Khul tĕch mơ dro kơ dih Việt Nam ‘nŏh ăn tơ băt: “Khei ‘năr âu ki athei pơ vang găn đunh tơ̆ lơ tơ ring, mă loi tơ̆ plt HCM, Hà Nội, dôm dêh char đei tơ ring jĭ kơ na anih tĕch mơ dro athei pơ dơ̆h jang ‘nŏh ưh kơ jor ôh, yoa 1 ‘măng athei jang đei 2 tơ drong, pơm ‘lơ̆ng ăn tơ drong jang xa, tĕch mơ dro hai, tang găn ‘lơ̆ng tơ drong jĭ hai ‘nŏh jĭ tơ drong tôch mơ mat, kơ na bơ̆n athei tơ gŭm ăn tơ drong jang kiơ kăl ƀiơ̆ vă jang hơ drol. Tôch pŭn, truh dang ei, Thủ tướng đei đon tơ chĕng, nơ̆r pơ tho tôch rơ đăh ‘nŏh arih xa hơ dai sơ đơ̆ng hăm jĭ Covid vă jang atŏk tơ iung mŭk drăm, inh tơ chĕng tơ drong ‘nâu gô roi ‘lơ̆ng ƀiơ̆ lơ̆m dôm khei hơ tuch sơ năm”.

Kŭm tơ rĕk truh trong jang yơ vă naih tĕch mơ dro hlôi păng tŏk bŏk pơ krơ̆ng đei gơ̆h vei kơ jăp tơ drong jang xa, tĕch mơ dro; trong jang yơ vă dôm anih tĕch mơ dro vei sơ đơ̆ng tơ drong jang xa vă gơ̆h jang tŏk dơ̆ng tơ̆ hơ năp kơnh…, yă Phí Thị Hương Nga – Phŏ kơ dră Lăm chih jô̆ găh Kơ măy kơ mŏk păng ming man, Anih chih jô̆ găh Anih tơm tơ lĕch nơ̆r sơ kơ̆t tơ mât jên jang đei nơ̆r tơ tă: “Kơ sô̆ anih tĕch mơ dro pơ dơ̆h jang 9 khei blŭng sơ năm mă lơ ‘nŏh anih tĕch mơ dro đei jên jang hơ la kơ 5 ti. Tơ drong tơ gŭm pơm tơ jur ƀiơ̆ jên jang ăn anih tĕch mơ dro ‘nŏh tôch gĭt kăl, pơ tih gia asong ăn anih tĕch mơ dro gơ̆h set hơ len jĭ Covid kơ dih păng tơ lĕch lơ trong jang xa, tĕch mơ dro mă lăp, oei pơm ‘lơ̆ng dôm tơ drong hơ găt găh tang găn jĭ Covid 19 păng dôm tơ ring athei hơ met pơ ‘lơ̆ng dôm hla ar phep pơm mơ mat tat ăn anih tĕch mơ dro”.

Pơ ma pơ tôch hop akŏm Khul kơ dră tĕh đak khei 9 âu ki, Thủ tướng Phạm Minh Chính pơ ma truh 1,2 tơ drong gĭt kăl, lơ̆m nŏh mă loi ‘nŏh athei tơ rĕk truh tơ drong jang xa đơ̆ng anih tĕch mơ dro. Mă hơ dăh ‘nŏh tơ lĕch hloi dôm trong jang vă tơ iung dơ̆ng tơ drong jang xa tơ̆ dôm tơ ring jang kơ măy, tơ ring jang mŭk drăm, tơ ring jang kơ măy ‘nao, tơ ring pơm tơ mam tĕch tơ̆ tĕh đah đe. Hơ met pơ ‘lơ̆ng dôm tơ drong mơ mat tat, tơ gŭm ăn anih tĕch mơ dro vei kơ jăp hla ar răt tơ mam, vei kơ jăp tơ drong chơ pơ truh tơ mam, adrin jang lơ̆m pơ yan jang xa tơm, mă loi hăm dôm anih răt tơ mam lơ tơ̆ châu Âu, Mi, Đông Bắc Á. Pơ gơ̆r iŏk yoa, tơ gĕch iŏk tơ drong ‘lơ̆ng đơ̆ng dôm tơ drong Tơ chơ̆t tĕch mơ dro hlôi đei kĭ pơ kăp. Tơ chĕng hơ len, tơ dra hơ drol tơ drong ‘mĕh vă răt yoa tơ mam ƀât hơ tuch sơ năm vă huei đei tơ drong ưh kơ măh tơ mam.

Dŏng: Tơ blơ̆