VOV4.Bahnar - Hloh 10 sơ năm pơm bơ ngai pơ gơ̆r pơ lei, ƀok A Bưn (bơ ngai Bahanar) oei tơ̆ plei Kon Tum Kơ Pâng, phường Thắng Lợi, pơ lei tơm Kon Tum, dêh char Kon Tum ling lang hơ drin krao hơ vơn kon pơ lei pơ jing tơ drong arih sa ‘lơ̆ng hơ iă tơ̆ tơ ring kon pơ lei oei, tơ gop pơm hơ met grŭp tơ goăt tơ goăl đĭ đăng kon pơ lei. Ƀok kŭm jing bơ ngai jang ‘lơ̆ng găh jang sa, jang mŭk drăm hơ gei.

Bơ ngai pơ gơ̆r pơ lei A Bưn tơ chĕng lăp đei hơ drin đĭ jơ hngơ̆m lơ̆m jang sa mă tơ gŭm mŭk drăm hơ tŏk tơ iung. Vă jang đei thoi noh, kơ dih kâu athei ư̆h kơ pơ dơh hŏk pơ hrăm, mong răk tơ drong hlôh vao păng mă loi ‘noh jĭ tơ plih đon tơ chĕng jang sa, băt choh jang sa, pơ tăm hơ lam, tơ plih ming ‘long pơ tăm lăp kiơ̆ pơ yan.

Sơ năm 2019, ƀơ̆t kơ jă rơ ya măk, sư pơ̆n tơ plih 6 sao teh ƀum ƀlang jing pơ tăm rơ ya. Đơ̆ng rŏng 8 khei pơ tăm, vei lăng, ŭnh hnam iŏk đei vă jê̆ 200 triệu hlak jên tĕch rơ ya hơ drih. Lơ̆m khei ‘năr gô iŏk yua 5 hek tar cheh phe, 3 hek tar tơ ƀăr, sư pơ tăm thim ƀum ƀlang, prit păng ƀa vă đei iŏk yua hơ nơ̆ng, sơ đơ̆ng. Đơ̆ng jên chă pơ đom đei, ŭnh hnam răt gre ô tô joăt chơ tơ mam choh jang sa ăn kon pơ lei. Đơ̆ng rŏng kơ jô̆ đĭ đăng jên jang, iŏk yua jô̆ păh lăp rim sơ năm kơ ŭnh hnam đơ̆ng 250 – 300 triệu hlak jên. Ƀok A Bưn tơ roi: “ Lai yơ kŭm athei năm hơ drol, đơ̆ng jang chŭn mir truh tơ gŭm băl. Ĭnh kŭm hơ nơ̆ng krao hơ vơn ‘nhŏng oh, mih ma duch nă, ĭnh athei năm hơ drol, ‘nhŏng oh, mih ma duch nă kiơ̆ đơ̆ng rŏng vă vei kơ jăp tơ drong tơ goăt tơ goăl hăm băl, tơ klep hăm băl vă sut pơ ngot, tơ jur dơ nuh hin.”

A Bưn tơ̆ 1 hop akŏm tơ roi tơ băt bơ ngai jang mŭk drăm hơ gei

Đơ̆ng jơ hngơ̆m đon ƀok pơ gơ̆r pơ lei A Bưn jang mŭk drăm hơ gei, tơ drong jang pơ jei băl jang sa, pơm tơ lĕch tơ̆ plei Kon Tum Kơ Pâng roi đei lang să. Plei đei 365 ŭnh hnam, hloh 1.500 ‘nu bơ ngai hăm dang 80% kon pơ lei kon kông arih sa. Hơ drin hơ tŏk tơ iung mŭk drăm đơ̆ng rim ŭnh hnam hlôi tơ gŭm iŏk yua jô̆ păh lăp kơ̆l bơ ngai lơ̆m tơ ring đei hloh 27 triệu hlak jên 1 sơ năm. Mŭk drăm ƀrư̆ ƀrư̆ đei ƀôh, sơ đơ̆ng, kon pơ lei roi thim tơ goăt tơ goăl, tơ klep, 1 jơ hngơ̆m pơ jing tơ drong arih sa ‘lơ̆ng hơ iă tơ̆ tơ ring kon pơ lei oei.

Ƀok Nguyễn Văn Hùng, Kơ dră Anih vei lăng kon pơ lei phường Thắng Lợi, pơ lei tơm Kon Tum, dêh char Kon Tum tơ băt dơ̆ng: “A Bưn ji bơ ngai pơ gơ̆r pơ lei plei Kon Tum Kơ Pâng hloh 10 sơ năm bơ̆ih. Sơ năm sơ̆, kon pơ lei kŭm lui pôk dơ̆ng ƀok pơm bơ ngai pơ gơ̆r pơ lei jăl jang 2020 – 2022. Lơ̆m khei ‘năr bơ̆ jang, A Bưn tôch kơ tơ năp, hơ drin, mă loi ‘noh jĭ tơ drong jang tơ roi tơ băt, krao hơ vơn kon pơ lei jang kiơ̆ anih kơ drơ̆m ‘lơ̆ng, jang kiơ̆ pơm trong man. A Bưn kŭm jing 1 lơ̆m dôm bơ ngai jang ‘lơ̆ng vă kon pơ lei lăng kiơ̆.”

Pơ nam, hơ drin lơ̆m jang sa, hơ bĕch hơ bal lơ̆m pơm tơ lĕch hlôi tơ gŭm ƀok pơ gơ̆r pơ lei A Bưn oei tơ̆ pơ lei tơm Kon Tum đei đăi hnam oei ‘lơ̆ng, tơ dronga rrih sa ŭnh hnam hiôk hian. Hăm đon tơ chĕng hơ gei păng dôm tơ drong vang tơ gop ăn tơ pôl lơ̆m pơ lei, ƀok pơ gơ̆r pơ lei A Bưn jĭ bơ ngai ‘lơ̆ng găh pơ jei băl ‘mêm kơ teh đak vă kon pơ lei hŏk pơ hrăm, lăng kiơ̆.

Thuem: Tơ blơ̆