VOV4.Bahnar - Pơ gê ‘năr 23/5, atŭm chơt hơ iă đơ̆ng lơ̆m teh đak hloh 427.000 ‘nu bơ ngai tăh hla kơ dêh char Dak Nông tơ̆ 680 hơ nih tăh kơ phiê̆u hlôi pơ gơ̆r pôk rơ̆ih bơ ngai tang măt Kuôk hô̆i jăl 15 păng bơ ngai tang măt Jơ nŭm pơ gơ̆r kon pơ lei rim tơ ring jăl jang 2021 - 2026. Lơ̆m jơ năr chơt hơ iă, ‘nă hal kơ năr lêh hơ drĕch hơ drŭng, tơ̆ hơ nih tăh kơ phiê̆u kơ sô̆ 4, plei N’JRiêng, plei Bu Sop xăh Đắk Nia, pơ lei tơm Gia Nghĩa, hloh 900 ‘nu bơ ngai tăh hla hlôi đei măt đơ̆ng pơ gê hrô̆ih vă vang pơm lêh pơ gơ̆r blŭng păng pơm kiơ̆ tơ drong gơ̆h jang đơ̆ng kơ dih.

Kon pơ lei pơm kiơ̆ ƀlep dơ̆ng hơ tăih băl ƀơ̆t năm pôk rơ̆ih tơ̆ Dak Nông

Bơ ngai tăh hla K’Bơn, tơ̆ plei Dinh, xăh Đắk Nia, pơ lei tơm Gia Nghĩa tơ roi:

 “Pơ gê ‘nâu 6 jơ 1 puăt ‘noh kon pơ lei hlôi năm pôk rơ̆ih. Kon pơ lei kŭm pơm kiơ̆ tơ drong gom muh măt, ôp ti, dơ̆ng hơ tăih băl 1 ‘nu 2 met kiơ̆ tơ drong tơ chơ̆t đơ̆ng Anih tơm vei lăng găh tơ drong jang pơ gang. Ŭnh hnam nhôn pơm kiơ̆ tơ păt jơ păng pôk ƀlep bơ ngai đei jơ hngơ̆m đon ‘lơ̆ng, gơh hơ gei, bơ ngai đei đe lui yom”.

Thuem: Tơ blơ̆