VOV4.Bahnar - Lăng tơ drong apinh jet ‘năr 11/11 tơ̆ hop akŏm mă 2, Kuô̆k hô̆i jăl XV, ƀok Ksor Yin, bơư ngai tăh hla tơ̆ phường Đống Đa, plt Pleiku, dêh char Gia Lai akhan, Kơ dră tơm vei lăng pơ tho pơ hrăm Nguyễn Kim Sơn tơl tơ blang tôch hơ len dôm tơ drong mă bơ ngai tang măt apinh, kiơ̆ jơ hngâm đon tơ păt ‘lơ̆ng, pơ ma hơ dăh dôm tơ drong tam mă lăp tơ̆ anih pơ tho pơ hrăm.

Lơ̆m nŏh, ƀok Yin tơ rĕk truh tơ drong ưh kơ lăp yoa ưh kơ măh thây kô, mă lei rim sơ năm anih pơ tho pơ hrăm tơ̆ dôm tơ ring oei hơ nơ̆ng bơ̆ jang kiơ̆ trong kăt tơ jur ƀiên chê̆. Ƀok Yin hơ pơi ‘mĕh, Anih tơm vei lăng pơ tho pơ hrăm kăl đei nơ̆r pơ ma hăm Khul kơ dră tĕh đak apinh jang kiơ̆ trong tơ gŭm hơ drô̆ vă pơm ‘lơ̆ng păng hơ tŏk tơ drong pơ tho pơ hrăm tơ̆ hơ năp kơnh.

Oei ƀok Y Khút Niê, sơ̆ pơm Phŏ Kơ dră Khul tang măt Kuô̆k hô̆i dêh char Dak Lak jăl 14 ‘nŏh akhan: Ƀok kơ dră hlôi tơl tơ blang dôm tơ drong đơ̆ng bơ ngai tang măt apinh lơ̆m hop akŏm păng đei hloi dôm tơ drong ưh kơ lăp đơ̆ng hop akŏm adrol ki, hơ pơi ‘mĕh ƀok Kơ dră kŭm hăm Anih pơ tho pơ hrăm jăh yak hlŏh dôm tơ drong mơ mat tat tôch dêh đơ̆ng jĭ Covid-19: 

“ Kiơ̆ nơ̆r apinh jet đơ̆ng dôm bơ ngai tang măt inh ƀôh, Kơ dră tơm mă đơ̆ng ‘nao jang ră mă lei băt hơ dăh rim tơ drong păng đei trong sek tơ lang ‘lơ̆ng. Mă lei tơ̆ hơ năp kơnh oei đei 1,2 tơ drong tih păng mơ mat tat ăn ƀok kơ dră, athei pơ gơ̆r hơ met ming khei ‘năr hŏk pơ hrăm mă loi hăm đe kon mon jăl 1 ‘nâu jĭ tơ drong athei tơ chĕng hơ len mă rơ đăh, mă ‘lơ̆ng ƀiơ̆.”

Dơ̆ng: Tơ blơ̆