VOV4.Bahnar  – Năr 6/10, tơ̆ apŭng Cư Mgar, dêh char Đăk Lăk ƀôh đei 1 anih hơbuh jĭ covid-19 lơ̆m tơpôl. Lơ khul jang tơ̆ tơring hlôi tenh kuăng pơkăp tơring vă tang găn jĭ.

Kiơ̆ kơ noh, pơgê năr 6/10, kiơ̆ đơ̆ng khăm hơlen tơ̆ Hnam pơgang Thiện Hạnh, anih jang y tê̆ ƀôh đei minh ‘nu ƀơm jĭ SARS COV2. Bơngai jĭ âu noh yă L.T.L, erih tơ̆ thôn Phú Thành, xăh Ea Drong, apŭng Cư Mgar. Kiơ̆ đơ̆ng hơlen test renh dôm bơngai F1, anih jang y tê̆ Cư Mgar pơtoi băt đei 5 ‘nu ƀơm jĭ SARS -CoV 2 noh 4 ‘nu tĕch pơdro tơ̆ kơchơ Cuôr Đăng păng 1 ‘nu noh xâu yă L.

Tơrĕk hloh noh, bơngai xâu âu oei hŏk tơ̆ hnam trưng jăl kơđeh Phan Bội Châu, xăh Ea Drơng. Kơtă lơ̆m kơmăng năr 6/10, khul kơpal hlôi pơkăp pơvei dôm anih oei xa kơ dôm bơngai ƀơm jĭ ‘nao roi tơ̆ kơpal păng tơlĕch test renh hăm hloh 200 ‘nu bơngai đei oei tơjê̆. Mă ‘mi tih mă lei khul jang tơ̆ tơring hlôi jang atŭm kơjăp pơvei hnam trưng jăl kơđeh Phan Bội Châu vă tang găn pơrang jĭ tơpoh lang xă. 

Lan chih păng pơre nơ̆r